Aqyly baılanys qyzmetteri endi abonenttiń eki márte kelisiminsiz qosylmaıdy
ASTANA. KAZINFORM — Qazaqstanda baılanys jáne ınternetke qatysty qosymsha aqyly qyzmetterdi qosý tártibi ózgeredi. Endi mundaı qyzmetter abonenttiń eki kezeńdi kelisiminen keıin ǵana iske qosylady. Bul týraly Ortalyq kommýnıkatsııalar qyzmetinde ótken brıfıngte QR Jasandy ıntellekt jáne tsıfrlyq damý vıtse-mınıstri Dosjan Musalıev málim etti.
Vıtse-mınıstrdiń aıtýynsha, abonenttiń kelisimi baılanys operatorynyń mobıldi qosymshasy, SMS-habarlama, telefon qońyraýy nemese USSD-suraý arqyly rastalady.
— Qosymsha aqyly baılanys jáne ınternet qyzmetteri abonenttiń eki kezeńdi kelisimin alǵannan keıin ǵana qosylady. Kelisimdi baılanys operatorynyń mobıldi qosymshasy, SMS-habarlama, telefon qońyraýy nemese USSD-suraý arqyly rastaýǵa bolady. Buǵan deıin ınternette jarnamany baıqamaı basyp qalý saldarynan aqyly jazylym avtomatty túrde rásimdelip ketetin jaǵdaılar kezdesken, — dedi Dosjan Musalıev.
Onyń sózinshe, jańa talap abonenttiń naqty kelisiminsiz aqyly qyzmetterdiń qosylýyna jol bermeýge jáne tutynýshylardyń quqyǵyn qorǵaýdy kúsheıtýge baǵyttalǵan.
Sonymen qatar bıyl maýsym aıynyń sońynda qabyldanǵan taǵy bir normaǵa sáıkes, endi abonentter baılanys operatorlary jiberetin jarnamalyq jáne aqparattyq habarlamalardan, sondaı-aq avtomatty qońyraýlardan («maıak») bas tarta alady.
Vıtse-mınıstrdiń aıtýynsha, bul ózgerister azamattar tarapynan jıi kóterilgen máselelerdi sheshýge baǵyttalǵan. Telekommýnıkatsııa salasyna qatysty zań bıyl tamyz aıynyń sońynda kúshine enedi. Al ony iske asyrý úshin qyrkúıektiń sońyna deıin 20-dan astam zańǵa táýeldi normatıvtik quqyqtyq akt qabyldanady.
Aıta keteıik, buǵan deıin mamandar azamattardy jeke derekterin qorǵaýǵa muqııat bolyp, zańsyz paıdalanylǵan jaǵdaıda dereý quzyrly organdarǵa júginýge shaqyrǵan edi.
