Aqyly avtoturaqta tegin turý ýaqyty kemi 30 mınýtqa jetkizile me — Roman Sklıardyń jaýaby
ASTANA. KAZINFORM — Premer-Mınıstrdiń birinshi orynbasary Roman Sklıar Májilis depýtattarynyń aqyly avtoturaqta tegin turý ýaqytyn kemi 30 mınýtqa jetkizý usynysyna jaýap berdi.
«Búgingi tańda kommýnaldyq aqyly avtoturaqtar Almaty jáne Astana qalalarynyń aýmaǵynda uıymdastyrylǵan. Olardyń operatorlary — «Almaty Parkıng» sharýashylyq júrgizý quqyǵyndaǵy memlekettik kommýnaldyq kásiporny jáne «Astana turaq keńistigi» JShS (memlekettik jekeshelik áriptestik sharty aıasynda). Astana qalasynyń ákimdigi men «Astana turaq keńistigi» JShS arasynda jasalǵan MJÁ shartynyń talaptaryna súıensek, aqyly avtoturaqtardan túsetin túsimderden jergilikti bıýdjettiń úlesi 2022 jylǵy jeltoqsanǵa deıin 5 paıyz, odan ári 2023 jyldan bastap, joba aıaqtalǵanǵa deıin 25 paıyzdy quraıdy. Kiristiń ara qatynasy ózgeretin bolsa, joba boıynsha (2 mlrd teńgeden astam), onyń ishinde tehnıkalyq jabdyq satyp alý boıynsha jeke áriptes shekken shyǵystardy eskersek, memlekettik-jekeshelik áriptestik jobasy oǵan tıimsiz bolady. Budan basqa, MJÁ sharty merziminen buryn buzylsa, onda mundaı buzýǵa bastamashy bolǵan tarap barlyq shyǵystardy, onyń ishinde alynbaı qalǵan paıdany ekinshi tarapqa óteýge mindetti», — dedi Úkimet basshysynyń birinshi orynbasary.
Osy oraıda Roman Sklıar depýtattardyń aqyly avtoturaqta tegin turý ýaqytyn kemi 30 mınýtqa jetkizý, beınebaqylaý kameralary arqyly salynatyn aıyppuldardy kemi 2 ese azaıtý usynystaryn eskere otyryp, normatıvtik-quqyqtyq aktiler turǵyda:
— jekeshe áriptestiktiń kommýnaldyq avtoturaqtardyń aýmaǵyn kútip-ustaý jáne jóndeý boıynsha mindetterin;
— aqyly avtoturaqtar (parkıngter) ornalastyrylatyn jerlerge jáne mınımaldy tegin turý ýaqytyna qoıylatyn talaptardy;
— kommýnaldyq avtoturaqtardy basqarý boıynsha úlgilik shartty bekitý boıynsha ýákiletti organnyń quzyretin bekitý jón ekendigin aıtady.
«Bastama jasalyp otyrǵan usynystar Qazaqstan Respýblıkasy Úkimetiniń zań jobalaý jumysy aıasynda pysyqtalatyn bolady», — dedi ol.
Buǵan deıin ákimderge avtoturaqtardy uıymdastyrý jáne olardyń sanattaryn aıqyndaý qaǵıdalaryn bekitý quzyreti beriletindigin jazǵan edik.