Aqyly avtomobıl joldaryn kimder tegin paıdalana alady

Qazaqstan Respýblıkasynyń 2001 jylǵy 17 shildedegi №245-II «Avtomobıl joldary týraly» Zańynyń 5-2-babyna sáıkes aqyly avtomobıl joldarymen (ýchaskelerimen) júrgeni úshin tólemnen mynadaı kólik quraldary bosatylady:

1. Qyzmettik mindetterin oryndaý kezinde paıdalanylatyn arnaıy avtokólik quraldary:

- jedel medıtsınalyq járdem uıymdarynyń;

- avarııalyq-qutqarý qyzmetteriniń;

- quqyq qorǵaý organdarynyń;

- kóliktik baqylaý organdarynyń;

- arnaýly memlekettik organdardyń;

- Qazaqstan Respýblıkasy Qarýly Kúshteriniń, basqa da áskerleri men áskerı quralymdarynyń;

- halyqaralyq jáne respýblıkalyq mańyzy bar jalpyǵa ortaq aqyly avtomobıl joldaryn (ýchaskelerin) kútip-ustaý men tehnıkalyq paıdalanýdy tikeleı júzege asyratyn ulttyq operatordyń;

- Qazaqstan Respýblıkasynyń zańnamasyna sáıkes tıisti aqyly avtomobıl jolyn (ýchaskesin) kútip-ustaý men tehnıkalyq paıdalanýdy tikeleı júzege asyratyn jekeshe áriptestiń;

- janýarlar dúnıesin qorǵaý, ósimin molaıtý jáne paıdalaný salasyndaǵy ýákiletti organnyń.

2. Kólik quraldarynyń jekelegen sanattary:

- qala mańyndaǵy qatynasta, sondaı-aq aqyly avtomobıl jolyna (ýchaskesine) irgeles ornalasqan eldi mekender men aýdan ortalyqtary, oblys ortalyqtary, Astana jáne respýblıkalyq mańyzy bar qalalar arasynda jolaýshylar men bagajdy turaqty tasymaldaýdy júzege asyratyn avtobýstar;

- aqyly avtomobıl jolyna irgeles aýdandarda tirkelgen avtobýstar – bir aýdan sheginde júrgen kezde;

- sý kedergileri men temirjoldardy kesip ótetin ýchaskelerdegi jaqyn ornalasqan kólik aıryqtarynyń arasynda júretin júk avtomobılderi, dońǵalaqty ózdiginen júretin aýyl sharýashylyǵy jáne melıoratsııalyq mashınalar;

- aqyly avtomobıl jolyna irgeles aýdandarda tirkelgen jeke jáne zańdy tulǵalardyń jeńil avtomobılderi – bir aýdan sheginde júrgen kezde.

3. Uly Otan soǵysynyń ardagerlerine tıesili jeńil avtomobılder.

Jeńildik qalaı beriledi?

Tegin júrýge quqyǵy bar kólik quraldarynyń memlekettik tirkeý nómirlik belgileri arnaıy aqparattyq derekqorǵa engiziledi. Osydan keıin aqyly ýchaskelerden ótken kezde kólik quraly avtomatty túrde sáıkestendirilip, jol júrý aqysy eseptelmeıdi.

Tegin júrý quqyǵyn qalaı rásimdeýge bolady?

Kólik quralyn jeńildik beriletin sanattar tizilimine engizý úshin «QazAvtoJol» ulttyq kompanııasy» AQ mynadaı qujattardy usyný qajet:

- resmı ótinish (ótinim);

- kólik quraldarynyń memlekettik tirkeý nómirlik belgileriniń tizbesi;

- turaqty avtobýs marshrýttary úshin (qajet bolǵan jaǵdaıda) qoldanystaǵy marshrýttyq qujattardyń kóshirmeleri.

Aıta ketý kerek, jeńildik kólik quralynyń memlekettik tirkeý nómirlik belgisi aqparattyq júıege engizilgennen keıin ǵana qoldanylady. Oǵan deıin aqyly avtomobıl jolymen júrgeni úshin tólem jalpy tártippen alynady.

Elimizde 10 shildeden bastap birqatar avtojol aqyly bolatynyn jazǵan edik.