Aqyldyń múmkindigi sheksiz: Djo Dıspenzanyń kitaby qazaq tilinde jaryq kórdi
ASTANA. KAZINFORM — Qazaq oqyrmanyna álemge tanymal neırobıolog ári jazýshy doktor Djo Dıspenza esimi burynnan tanys. Endi onyń eń ataqty eńbekteriniń biri - «Aqyldyń múmkindigi sheksiz» kitaby tuńǵysh ret qazaq tilinde jaryq kórip otyr. Astanada ótken tusaýkeser sharasy Meloman, Foliant jáne KazFeltec kompanııalarynyń birlesken jobasy retinde uıymdastyryldy.
— Biz buǵan deıin Dıspenzanyń «Sergek sana» atty kitabyn qazaqsha shyǵardyq, ol óte jaqsy satyldy. Sol sebepti oqyrman suranysymen «Aqyldyń múmkindigi sheksiz» kitabyn aýdardyq. Redaktsııalyq, betteý, korrektýra jumystary 7-8 aıǵa sozyldy. Al demeýshi tabylǵan soń birden basyp shyǵardyq. Alǵashqy tıraj — 2000 dana. Bul eńbekte medıtatsııanyń tehnıkasy, tynys alý júıesi, armandarǵa jetý joldary egjeı-tegjeıli baıandalady. Kitapty oqyp shyqqan adam óz ómirin transformatsııalaı alady. Eshqandaı trenıngke barmaı-aq, ózińizge psıholog bola alasyz, — deıdi Foliant baspasy Non-fiction bóliminiń aǵa redaktory Lıazzat Kemelbaeva kitaptyń mazmuny men daıyndalý barysy týraly.
Onyń aıtýynsha, kelesi jyly Djo Dıspenzanyń «Platsebo» dep atalatyn taǵy bir kitabyn qazaqsha basyp shyǵarý josparlanyp otyr.
Marwin/Meloman dúkenderi jelisinde ótip jatqan BOOKFEST 2025 festıvali aıasyndaǵy is-shara moderatory, jýrnalıst Maqsat Asylbaıuly Dıspenza eńbegin ulttyq rýhanııatpen baılanystyrdy.
— Bul kitapta baıandalatyn ıdeıalar bizdiń dástúrli dúnıetanymmen úndes. ıAssaýıden bastap Beket ata, Máshhúr Júsip, Abaı, Shákárimge deıin jalǵasqan rýhanı ilimmen sabaqtas. Keńes kezinde tyıym salynǵan bul bilim túri bizdiń ata-babalardan kele jatqan rýhanı tájirıbeniń zamanaýı ǵylymı jalǵasy deýge bolady.
Basqasý barysynda Quiz oıyny uıymdastyrylyp, jeńimpazdarǵa jańa kitaptar syılandy. Kesh sońynda Djo Dıspenza iliminiń basty elementi — medıtatsııa tájirıbesi ótkizilip, qonaqtar kitap rýhyn ózderi sezinip shyqty.
Aıta ketelik, buǵan deıin elordada belgili qalamger Baıanǵalı Álimjanovtyń balalarǵa arnalǵan «400 tátti taqpaq» atty taqpaqtar jınaǵynyń tanystyrylymy ótti.
Kamıla Múlik