«Aqyldy jol» mamany, tsıfrlyq logıst: Kólik salasynda jańa kásipter paıda boldy
ASTANA. KAZINFORM – Tehnologııanyń ózgerýine baılanysty Qazaqstannyń kólik salasyna 31 jańa mamandyq qajet. Olardyń qatarynda BIM tsıfrlyq jobalaýshylary, «aqyldy joldar» mamandary, tsıfrlyq logıster, jasandy ıntellektpen jumys isteıtin dıspetcherler jáne pılotsyz tehnıkanyń operatorlary bar.
Kólik mınıstri Nurlan Saýranbaevtyń aıtýynsha, eldegi kólik salasy mamandaryn 37 joǵary oqý orny men 47 kolledjde daıyndaıdy.
Jalpy sany 44 myńǵa jýyq stýdent bilim alsa, onyń 28 myńnan astamy memlekettik grant esebinen oqıdy.
– Bizdiń josparymyz kólik salasyna naqty qajet mamandardy oqytý, jáne bolashaqta kerek mamandardy daıyndaý. Qazirgi kezde, tehnologııanyń ózgerýine baılanysty, kólik salasyna 31 jańa mamandyq qajet, – dedi N. Saýranbaev Úkimettiń búgingi otyrysynda.
Jańa mamandyqtar kólik salasynyń negizgi baǵyttaryn qamtıdy. Avtojol salasynda BIM tsıfrlyq jobalaýshylary, «aqyldy jol» mamandary jáne qurylys robottarynyń operatorlary qajet.
Temirjol jáne logıstıka salasynda – tsıfrlyq logıster men avtomatıka mamandaryna suranys artyp keledi.
Avıatsııa salasynda – jasandy ıntellektpen jumys isteıtin dıspetcherler, áýe qozǵalysyn AI arqyly jobalaý mamandary jáne pılotsyz tehnıkanyń operatorlary qajet.
Mınıstrdiń aıtýynsha, osy baǵytta memlekettik organdar men bilim berý uıymdary birlesip jumys istep jatyr.
Aıta keteıik, kolledj-tehnıkýmdardyń 90 myńnan astam túlegi óz mamandyǵy boıynsha jumysqa ornalasqan.
2035 jyly elimizde 1,8 mln jumysshy mamanǵa suranys bolady.
