Aqyldy saǵattar júrek yrǵaǵy men uıqydaǵy tynysty baqylaıdy
ASTANA. KAZINFORM — Qazaqstan Respýblıkasy Densaýlyq saqtaý mınıstrligi óndirýshi kompanııalarmen tikeleı kelisimder sheńberinde Apple Watch, Samsung Galaxy Watch jáne AirPods Pro qurylǵylaryndaǵy densaýlyqty baqylaýdyń ınnovatsııalyq fýnktsııalaryna qoljetimdilikti keńeıtti.
Endi qazaqstandyqtar smart-saǵattary men qulaqqaptary arqyly elektrokardıogramma (EKG) túsirip, arterııalyq qan qysymyn ólsheı alady, júrek yrǵaǵynyń buzylýy men uıqy kezindegi apnoe qaýpi týraly habarlamalar alyp, sondaı-aq estý qabiletin teksere alady.
Qol jetkizilgen kelisimniń arqasynda budan bylaı Apple jáne Samsung kompanııalary engizetin barlyq jańa medıtsınalyq jáne profılaktıkalyq servıster úılesimdi qurylǵylarda álemniń basqa elderinde resmı iske qosylǵan sátten bastap Qazaqstandaǵy paıdalanýshylarǵa da qoljetimdi bolady. Bul rette óńirlik kidirister men shekteýler bolmaıdy.
Apple Watch jáne Samsung Galaxy Watch-tyń úılesimdi modelderinde paıdalanýshylar naqty ýaqyt rejıminde EKG túsirip, arıtmııa belgilerin baqylaı alady jáne alynǵan nátıjelerdi smartfonda saqtap, keıin dárigermen talqylaı alady. Sondaı-aq saǵattar uıqy kezindegi tynys alý sapasyn taldaý fýnktsııasyn qoldaıdy jáne yqtımal apnoe týraly eskertedi. Budan bólek, Samsung smart-saǵattarynda Samsung Health Monitor qosymshasy arqyly arterııalyq qan qysymyn ólsheýge bolady.
Bul fýnktsııany paıdalaný úshin qurylǵyny manjetasy bar tonometrdiń kómegimen ár 28 kún saıyn aldyn ala kalıbrleý qajet.
Al AirPods Pro qulaqqaptarynyń ıeleri «Densaýlyq» qosymshasy arqyly estý qabiletin teksere alady, al jeke estý apparatynyń fýnktsııasy jeńil nemese ortasha dárejedegi estý qabiletiniń tómendeýi bolýy múmkin eresek adamdar úshin qorshaǵan ortadaǵy dybystardy avtomatty túrde beıimdep, kúsheıtýge múmkindik beredi.
Jańa servısterdi paıdalaný úshin paıdalanýshylar smartfondarynyń, smart-saǵattary men qulaqqaptarynyń baǵdarlamalyq jasaqtamasyn jańartyp, sodan keıin tıisti fýnktsııany qosymshada baptaýy qajet.
Densaýlyq saqtaý mınıstrligi tsıfrlyq qurylǵylardyń bul fýnktsııalary kúndelikti profılaktıka men óz densaýlyǵyn baqylaýǵa arnalǵanyn atap ótti. Alaıda olar tolyqqandy medıtsınalyq tekserýdi, dıagnoz qoıýdy jáne mamannyń em taǵaıyndaýyn almastyrmaıdy.
Aıta ketelik Almatyda ókpe qaterli isigine robot-assıstent kómegimen alǵashqy ota jasaldy.
