Aqyldy kıiz úı: Mańǵystaýlyq stýdentter dástúr men tehnologııany biriktirdi
ASTANA. KAZINFORM — Naýryz merekesinde mańǵystaýlyq stýdentter dástúrli baspanany zamanaýı tehnologııamen ushtastyrǵan erekshe jobasyn kórsetti, dep habarlaıdy Oqý-aǵartý mınıstrliginiń baspasóz qyzmeti.
Ulystyń uly kúni — Áz-Naýryz merekesi aıasynda Mańǵystaýda tyń joba kópshilik nazaryna usynyldy. N.Bekbosynov atyndaǵy Mańǵystaý energetıkalyq kolledjiniń stýdentteri «SMART KIIZ ÜI» ınnovatsııalyq ázirlemesin tanystyrdy.
Joba dástúrli kıiz úıdi tsıfrlyq tehnologııalarmen biriktirip, «aqyldy» turǵyn úı kontseptsııasyn usynady.
— Atap aıtqanda, kıiz úı balamaly energııa kózderimen, sonyń ishinde kún panelderimen jabdyqtalǵan. Arnaıy mobıldi qosymsha arqyly jaryq júıesin jáne esik-terezelerdi qashyqtan basqarýǵa bolady. Sonymen qatar ishki klımat avtomatty túrde rettelip, temperatýra men ylǵaldylyq turaqty baqylaýda ustalady. Qaýipsizdik maqsatynda órt pen gazdy anyqtaıtyn sensorlar ornatylǵan, — delingen habarlamada.
Ázirleme týrızm salasyna da baǵyttalǵan. Jobany glempıng formatynda paıdalaný ulttyq qundylyqtardy zamanaýı ómir saltymen úılestirýge múmkindik beredi.
Bul bastama stýdentterdiń IT, energetıka jáne dızaın baǵyttaryndaǵy bilimin tájirıbede tıimdi qoldana alatynyn kórsetedi. Sonymen qatar mundaı jobalar óńirdiń ınnovatsııalyq jáne tsıfralyq damýyna serpin beredi.
Osyǵan deıin Jezqazǵanda «Úzdik kıiz úı» baıqaýy ótip, jeńimpazdar aqshalaı syılyqtarǵa ıe boldy.
