«Aqyldy keden» jobasy kedendik rásimderdi túbegeıli ózgertedi - sarapshy
ASTANA. KAZINFORM – Bıylǵy Joldaýda Prezıdent Qasym-Jomart Toqaev tsıfrlandyrý úderisin kúsheıtip, memlekettiń serpindi damýyna áser etetin bastamalardy júktedi. Bul týraly sarapshy, Digital Silk Road Company dırektory Erlan Hasenov aıtty.
Onyń aıtýynsha, quzyrly organdarǵa tsıfrlandyrý jumystaryn eseleý tapsyrylǵannan keıin keden qyzmetinde birqatar jobalar júzege asyryla bastady.
– Qazaqstan-Qytaı ekonomıkalyq yntymaqtastyǵyn nyǵaıtý sheńberinde «Baqty (QR) – Pokıtý (QHR)» shekaralyq ótkizý pýnktinde «aqyldy keden» qanatqaqty jobasy qolǵa alyndy. Onyń mańyzdy elementteriniń biri – kedendik logıstıkanyń tıimdiligin arttyryp, tsıfrlandyrýǵa baǵyttalǵan avtonomdy (pılotsyz) júk tasymaldaryn engizý. «Aqyldy keden» shekaradan jyldam ári jaıly ótýge septesetin zamanaýı sheshimderdi qamtıdy. Júkter shekaradan júrgizýshisiz avtomatty túrde tasymaldanady, – dedi Erlan Hasenov.
Onyń aıtýynsha, eki el birlesip rastaıtyn biryńǵaı elektrondy deklaratsııa engizý josparlanǵan. Qujattardy rásimdeý men júkterdi alyp júrý tolyqtaı tsıfrly formatqa kóshiriledi.
– Bul bastama tabysty iske assa, júkter táýlik boıy avtomatty navıgatsııa men baqylaý júıeleri arqyly jóneltiledi. Nátıjesinde júk kólemi jylyna 10 mln tonnaǵa deıin artyp, kedendik rásimdeý ýaqyty qysqarady. Logıstıkalyq operatsııalardyń ashyqtyǵy men qaýipsizdigi artyp, avtomobıl ınfraqurylymyna túsetin júkteme azaıady. Bul óz kezeginde jańa logıstıkalyq habtardy damytýǵa jol ashady, – dedi ol.
Spıkerdiń aıtýynsha, atalǵan joba shekaradaǵy ınfraqurylymdy jańǵyrtyp qana qoımaı, jumys oryndaryn ashýǵa jáne ınvestıtsııalar tartýǵa oń áser etedi. Sonymen qatar Qytaımen saýdany ulǵaıtyp, Qazaqstannyń Ortalyq Azııadaǵy mańyzdy tranzıttik ortalyq retindegi rólin nyǵaıtady.
– Budan bólek, elimizdiń keden beketterin jańǵyrtý jumystary jalǵasýda. 2025 jyldyń basynan beri 4 ótkizý pýnkti («Qaljat», «Alakól», «Qaplanbek» jáne «Atameken») iske qosyldy. Jyl sońyna deıin taǵy 5 ótkizý pýnkti («Qazyǵurt», «Tájen», «Temir baba», «Maıqapshaǵaı» jáne «Baqty») jańǵyrtylady. Jańa pýnktterde shekarany jaıly ári qaýipsiz ótý úshin barlyq jaǵdaı jasalǵan, – dedi Erlan Hasenov.
Sonymen qatar ol Qarjy mınıstrliginiń ótkizý pýnktterin jańǵyrtýmen qatar, kedendik rásimderdi tsıfrlandyrý men avtomattandyrýdy kezeń-kezeńimen iske asyryp kele jatqanyn atap ótti.
– 2023 jyldan bastap EAEO syrtqy shekarasynyń barlyq avtomobıl ótkizý pýnktinde CarGoRuqsat elektrondy kezek júıesi engizildi. Bul respýblıkalyq mańyzy bar avtojoldardaǵy kólikterdiń keptelisin boldyrmaı, júk tasymaly protsesiniń ashyqtyǵy men tıimdiligin arttyrýǵa yqpal etti, – dedi sarapshy.
Erlan Hasenovtiń aıtýynsha, qabyldanyp jatqan sharalardyń barlyǵy eldiń tranzıttik áleýetin nyǵaıtýǵa, ekonomıkany ártaraptandyrýǵa jáne halyqtyń ál-aýqatyn arttyrýǵa baǵyttalǵan.
– Prezıdentimiz belgilegen maqsat-mindetterdi oryndaýǵa qashanda daıynbyz. Kózdegenimiz – adamǵa baǵdarlanǵan qyzmetti damytyp, otandastarymyzdyń ómir súrý sapasyn arttyrý, – dedi Digital Silk Road Company dırektory.
Aıta keteıik, keden beketterindegi kameralar Astanadaǵy monıtorıng ortalyǵyna tikeleı qosylady.