Aqylbek Kúrishbaev: UǴA ǵylymdy ekonomıkaǵa beıimdeýge mán berip otyr

QYZYLORDA. KAZINFORM — Qyzylorda qalasynda V Ulttyq quryltaı aıasynda ótip jatqan sektsııalyq otyrysta Ulttyq ǵylym akademııasynyń prezıdenti Aqylbek Kúrishbaev ǵylymdy ekonomıkaǵa beıimdeý máselesin kóterdi.

Aıtýynsha, osyǵan deıingi Ulttyq quryltaılarda kóterilgen túıtkilder kezeń-kezeńimen iske asyp keledi. 

— Endigi másele — ǵylymdy ekonomıkaǵa beıimdeý. Bul baǵyttaǵy jumystardy saralaǵanda ǵylymı taqyryptar ekonomıka suranysyn emes, ǵalymdardyń múmkindigine qaraı qalyptasatyny baıqalady. Ulttyq ǵylym akademııasy muny forsaıt tásiliniń turaqty josparlaý quralyna aınaldyra aldy. Eki jyl ishinde óńirlik jáne salalyq sessııalar ótkizip, 220 perspektıvaly mindet pen 65 ǵylymı-tehnıkalyq tapsyrma ázirledik. Osyǵan deıin jetkilikti kóńil bólmeý saldarynan kóptegen ǵylymı mektepten aıyrylyp qaldyq. Osyǵan baılanysty Ulttyq ǵylym akademııasy «Korea Institute of Science and Technology Information» uıymymen birlesip «AI SilkNet» ortalyǵyn qurdy. Bul bizge álemdegi jańa tehnologııa týraly keńinen derek alýymyzǵa múmkindik beredi. Ǵylymdaǵy ozyq tehnologııamen qatar kúni ótken ádisterdi de osy ortalyq arqyly anyqtap, ózimizge tıimdisin tańdaı alamyz, — dedi ol.

Aqylbek Kúrishbaev sektsııa otyrysynda aldaǵy ýaqytta osy bastamany damytyp, Ortalyq Azııadaǵy qyzmet etetin aqparattyq ortalyqqa aınaldyrýǵa bolatyny jóninde usynys bildirdi. 

— Óńirlik ǵylymdy damytý da — alda turǵan úlken másele. Elimizdegi ǵalymdardyń basym kópshiligi Astana men Almaty qalalarynda shoǵyrlanǵan. Bólingen qarjynyń kóp bóligi osy qalalar úlesine tıedi. Óńirlik ǵylym túrli baǵyttaǵy qoldaýlardan da syrt qalyp keledi, — dedi Ulttyq ǵylym akademııasynyń prezıdenti.

Ol ǵylymnyń ekonomıkany damytýǵa áserin arttyrý úshin bul máselege jete mán berý kerektigin atap ótti.

Aıta keteıik, búgin Qyzylorda qalasynda V Ulttyq quryltaı bastaý aldy.