Aqylbek Kúrishbaev QR Ulttyq ǵylym akademııasynyń prezıdenti laýazymyna taǵaıyndaldy
ASTANA. KAZINFORM – Memleket basshysynyń ókimimen Aqylbek Kúrishbaev Qazaqstan Respýblıkasynyń Ulttyq ǵylym akademııasynyń prezıdenti laýazymyna taǵaıyndaldy.
«Memleket basshysynyń ókimimen Aqylbek Qajyǵululy Kúrishbaev Qazaqstan Respýblıkasynyń Ulttyq ǵylym akademııasynyń prezıdenti laýazymyna taǵaıyndaldy»,- dep jazylǵan Aqordanyń resmı saıtynda.
Aıta keteıik, Aqylbek Kúrishbaev 1961 jylǵy 13 sáýirde Almaty qalasynda dúnıege kelgen.
Aýyl sharýashylyǵy ǵylymdarynyń doktory, professor, Qazaqstan Respýblıkasy Ulttyq ǵylym akademııasynyń jáne Reseı aýylsharýashylyq ǵylymdary akademııasynyń akademıgi. A. I. Baraev atyndaǵy syılyqtyń laýreaty, 200-den asa jarııalanymnyń, 4 monografııanyń avtory.
1983 jyly Aqylbek Kúrishbaev Qazaq aýylsharýashylyq ınstıtýtyn «Agrohımııa jáne topyraqtaný» mamandyǵy boıynsha úzdik bitirdi.
1977 jyly eńbek jolyn Almaty oblysy Talǵar aýdanyndaǵy MRSHO birlestiginde kombaıner bolyp bastaǵan.
1983 jyly V.Vılıams atyndaǵy Qazaq eginshilik ǵylymı-zertteý ınstıtýtynyń laboranty bolǵan.
1984 jyly aspırantýraǵa oqýǵa túsken.
1986 – 1997 jyldar aralyǵynda V.Vılıams atyndaǵy Qazaq eginshilik ǵylymı-zertteý ınstıtýtynda kishi ǵylymı qyzmetker, kásipodaq tóraǵasy, aǵa ǵylymı qyzmetker, dırektordyń ǵylym jónindegi orynbasary laýazymdarynda qyzmet atqarǵan.
1997 – 2002 jyldary A.I.Baraev atyndaǵy astyq sharýashylyǵy ǵylymı-zertteý ınstıtýtynyń dırektory bolǵan.
2002 – 2005 jyldary Qazaqstan Respýblıkasynyń Aýyl sharýashylyǵy vıtse-mınıstri laýazymyn atqarǵan.
2006 jyly QR AShM Ǵylym departamentiniń dırektory bolyp taǵaıyndalǵan.
2007 jyly Qazaqstan Respýblıkasynyń Aýyl sharýashylyǵy vıtse-mınıstri bolyp qaıta taǵaıyndalǵan.
2008 – 2011 jyldary Qazaqstan Respýblıkasynyń Aýyl sharýashylyǵy mınıstri laýazymyn atqarǵan.
2011 – 2020 jyldary «S.Seıfýllın atyndaǵy Qazaq agrotehnıkalyq ýnıversıteti» Aktsıonerlik qoǵamynyń Basqarma Tóraǵasy bolǵan.
2020 jyl tamyz aıy – 2022 jyly qazan aıy aralyǵynda Qazaqstan Respýblıkasy Parlamenti Senatynyń depýtaty bolǵan.
2022 jyly 1 qarashada «Qazaq Ulttyq agrarlyq zertteý ýnıversıteti» KeAQ Basqarma Tóraǵasy – Rektory laýazymyna taǵaıyndaldy.
