Aqıqatqa týra qaraýymyz kerek: álem túbegeıli ózgerdi — Prezıdent
NЬıÝ-IORK. KAZINFORM — Qazirgi býyn kóshbasshylarynyń áreketsizdiginiń zardabyn keler urpaq tartady. Bul málimdemeni Prezıdent Qasym-Jomart Toqaev BUU Bas Assambleıasynyń 80-shi sessııasy aıasyndaǵy Jalpy debatta aıtty.
— Birikken Ulttar Uıymy 80 jyldan beri adamzatqa tóngen jahandyq syn-qaterlerdi eńserýde basty ról atqaryp keledi. Osy jyldary uıym bizdiń ujymdyq qaýipsizdik, ıadrolyq qarýdy taratpaý, beıbitshilikti saqtaý, ósip-órkendeý, kedeılikti azaıtý, ornyqty damý jáne adam quqyǵyn qorǵaý baǵytyndaǵy ortaq kúsh-jigerimizdi ilgeriletýge bastamashy boldy. Alaıda aqıqatqa týra qaraýymyz kerek: álem túbegeıli ózgeriske ushyrady. Ókinishke qaraı, jaqsy jaqqa qaraı ózgerdi dep aıtý qıyn. Dál sol sebepti jer júzindegi mıllıondaǵan adam Birikkken Ulttar Uıymyna úlken úmitpen kóz tigip otyr, — dedi Qasym-Jomart Toqaev.
Prezıdent búgingi tarıhı kezdesýdiń ámbebap jáne balamasy joq uıymnyń irgeli qaǵıdattary men maqsattaryna qanshalyqty beıil ekenimizdi dáleldeıtin oraıly múmkindik ekenin atap ótti.
— Áıtse de biz kópjaqty ınstıtýttarǵa senimniń daǵdarysqa ushyraǵanyn aıtpaı kete almaımyz. Halyqaralyqtyń quqyqty óreskel buzý «qalypty jaǵdaıǵa» aınaldy. Sonyń saldarynan álemdegi turaqtylyqqa nuqsan kelip, halyqtardyń, saıası kóshbasshylar men memleketterdiń bir-birine senimi álsireı tústi. Qazirgideı almaǵaıyp kezeńde bárimiz BUU pozıtsııasynyń nyǵaıýyna yqpal etip, uıymnyń qubylmaly zamanǵa beıimdelýine qolǵabys etýimiz qajet. Ózara túsinistik pen yntymaqtastyq rýhy soǵys órtin tutandyrýdan basym bolýǵa tıis, — dedi Memleket basshysy.
Sonymen birge, Prezıdent memleketterdiń basshylary beıbitshilikke umtylý jolynda jaýapkershilik arqalaıtynyn jetkizdi.
— Qazirgi býyn kóshbasshylarynyń áreketsizdik tanytýǵa esh quqyǵy joq. Óıtkeni onyń zardabyn kelesi urpaq tartady, — dedi dedi Qasym-Jomart Toqaev.
Buǵan deıin habarlaǵanymyzdaı, búgin Memleket basshysy BUU Bas Assambleıasynyń mereıtoılyq 80-sessııasynyń Jalpy debattyń ashylýyna qatysyp jatyr. Prezıdent Qasym-Jomart Toqaev TMD elderi basshylarynyń ishinde birinshi bolyp sóz sóıledi. Jıynǵa barlyǵy 97 memleket basshysy qatysyp otyr.
Prezıdent AQSh sapary aıasynda 20-dan astam kezdesý ótkizdi.