«Aqıqat» jýrnalynyń 100 jyldyǵyna arnalǵan kórme ashyldy

ALMATY. QazAqparat - Almaty qalasynda QR Ortalyq memlekettik mýzeıinde «Aqıqat» ulttyq qoǵamdyq-saıası jýrnalynyń 100 jyldyǵyna arnalǵan «Kemel oıdyń kerýeni» atty kórme ashyldy, dep habarlaıdy QazAqparat.

«Aqıqat» ulttyq qoǵamdyq-saıası jýrnaly alǵash 1921 jyldyń 15 qyrkúıeginde Orynborda «Qyzyl Qazaqstan» degen atpen jaryq kórgen. Sol kezeńniń ótkir máselelerin kótergen basylymda Nyǵmet Nurmaqov, Smaǵul Sádýaqasov, Oraz Jandosov, Janaıdar Sádýaqasov sııaqty saıası tulǵalar qyzmet etken.

M.Áýezovtiń «Qorǵansyzdyń kúni», B.Maılınniń «Shuǵanyń belgisi», T.Rysqulovtyń tarıhı maqalalary alǵash osy jýrnalda shyqty.

Basylym ataýy birneshe ret ózgerip, «Qazaqstan bolshevıgi», «Qazaqstan kommýnısi» dep ataldy.

1991 jyldyń qyrkúıeginen bastap jýrnal «Aqıqat» ataýymen shyǵyp keledi. «Jýrnaldyń rebrendıngi 1991 jyly Qazaqstan Táýelsizdigin alǵan kezeńmen tuspa-tus kelýi jaqsylyqtyń nyshany bilemiz», — dep atap ótti basylym qyzmetkerleri.

«Aqıqat» jýrnaly 2002 jyly Qazaqstan Jýrnalıster Akademııasynyń «Altyn juldyz», 2008 jyly Jýrnalıster odaǵynyń syılyqtaryna ıe boldy. 2021 jyly QR Prezıdenti Qasym-Jomart Toqaevtyń alǵys hatymen marapattaldy.

Kórmege jýrnaldyń alǵashqy sandary, arhıvtegi qundy derekter, tarıhı jarııalanymdardyń kóshirmeleri qoıylady.

Kórme 2021 jyldyń 22 qyrkúıeginen 6 qazanǵa deıin jumys isteıdi.