Ákesiniń kóligin ruqsatsyz minip ketken kókshetaýlyq úsh jasóspirim jol apatyna ushyrady

Kókshetaýda jasóspirimder ruqsatsyz mingen avtokólik jol apatyna ushyrap, birneshe kólik pen kóshe boıyndaǵy jaryq baǵanyna zalal keldi, dep habarlaıdy Kazinform.

Aqmola oblystyq PD baspasóz qyzmetiniń málimetinshe, jol*kólik oqıǵasy 3 jeltoqsan 19:30 shamasynda Táshenov kóshesiniń boıynda bolǵan.

Anyqtalǵandaı, Táshenov kóshesiniń boıynda jyldamdyq rejımin saqtamaǵan Honda Odyssey avtokóliginiń júrgizýshisi avtoturaqta turǵan Hyundai i40 kóligin soqqan.

Qatty soqqydan kólik ornynan jyljyp, meshit qorshaýyn qıratqan.

Sonymen birge, Honda Odyssey avtokóligi qatty ekpinmen kósheniń jaryq shamdarynyń baǵanyna jáne VAZ-2107 avtokóligine soǵylǵan.

Keıin Honda Odyssey júrgizýshisi oqıǵa ornynan qashyp ketti. Degenmen tártip saqshylary kináli júrgizýshini anyqtady.

Belgili bolǵandaı, kóliktiń rýlindegi 16 jasar jergilikti turǵyn bolyp shyqty.

Sonymen birge, kóliktiń salonynda 14 jasar ul men 17 jasar qyz bala boldy. Kólik 14 jasar balanyń ákesine tıesili, jasóspirimder kólikti ruqsatsyz alǵan.

– Qazirgi kezde «Honda Odyssey» avtokóligi mamandandyrylǵan avtoturaqqa qoıylyp, saraptama taǵaıyndaldy, – dedi vedomstvodan.

Aıta ketsek, budan buryn Aqmola oblysynda arbadaǵy adam jedel járdem kóliginiń astyna túsip mert bolǵanyn jazǵan edik.