Ákesin uryp, qorlaǵan turǵyn: Máıitke eksgýmatsııa jasalyp, saraptama taǵaıyndaldy

TÚRKІSTAN. KAZINFORM – Áleýmettik jelide ákesin balaǵattap, urǵan jigit týraly vıdeo qoǵamda úlken rezonans týdyrǵan bolatyn. Tipti kelini de júıeli túrde uryp-soǵyp, qorlap kelgen. Keıin qarııa qaıtys boldy.

Atalǵan jaǵdaıǵa qatysty Túrkistan oblysy Polıtsııa departamenti qylmystyq is qozǵady. 

Túrkistan oblysy Densaýlyq saqtaý basqarmasy usynǵan aqparatqa súıensek, Shardara aýdanyna qarasty Qosseıit aýylynyń turǵyny, Esirkep Sádibekuly Sadaqbaev 2025 jyldyń 2-nen 3-shi qyrkúıegine qaraǵan túni kóz jumǵan.

– Týystary der kezinde habarlamaǵandyqtan, medıtsınalyq qyzmetkerler tarapynan qaıtys bolý týraly anyqtama berilmegen. Qazir máıitke eksgýmatsııa jasalyp, saraptama júrgizilip jatyr. Qorytyndysy shyqqan soń qosymsha málimet usynylady, - delingen Densaýlyq saqtaý basqarmasy usynǵan aqparatta.

Dárigerler naqty ólim sebebin sot-medıtsınalyq saraptama qorytyndysy shyqqannan keıin ǵana habarlaıtyn bolady. Marqum tiri kezinde «I11» jáne «M42» dıagnozymen dınamıkalyq baqylaýda bolǵan. Dene jaraqattary boıynsha medıtsınalyq kómekke júginbegen ári shaǵym túsirmegen.

Aıta keteıik, budan buryn Túrkistan oblysynda ákesin uryp, qorlyq kórsetken turǵyn qamaýǵa alynǵanyn jazǵan bolatynbyz.

Keıin ákesine qorlyq kórsetken uldyń áıeline qatysty qylmystyq is qozǵaldy.

Al óńirdiń bas ımamy Shardarada ákesine qol kótergen azamat meshitte azanshy bolmaǵanyn málimdedi.