Ákesin aıaýsyz uryp-soqqan: Shardaradaǵy qarııanyń ólimi boıynsha is sotqa joldandy
TÚRKІSTAN. KAZINFORM — Túrkistan oblysynda qart adamnyń qatygezdikpen uryp-soǵý saldarynan qaıtys bolýyna qatysty qoǵamda úlken rezonans týdyrǵan qylmystyq istiń tergeýi aıaqtaldy.
Іs materıaldary sotqa joldandy. Tergeý derekterine sáıkes, qaıǵyly oqıǵa Shardara aýdanyna qarasty Qosseıit aýylynda bolǵan. 70 jastaǵy Esirkep Sadaqbaev uzaq ýaqyt boıy jalǵasqan fızıkalyq zorlyq-zombylyqtyń saldarynan kóz jumǵan. Atalǵan is boıynsha onyń uly basty kúdikti retinde tanylyp otyr.
Kúdiktige QR Qylmystyq kodeksiniń 106-babynyń 3-bóligi — jábirlenýshiniń ólimine ákep soqqan qasaqana aýyr dene jaraqatyn keltirý baby boıynsha aıyp taǵyldy.
Sot úkimi shyqqanǵa deıin ol tergeý ızolıatorynda qamaýda bolady.
Qamaýǵa alý týraly sheshim áleýmettik jelilerde zorlyq-zombylyq kórinisteri beınelengen beınejazbalar taralǵannan keıin jáne resmı tergeý bastalǵan soń qabyldandy.
Sonymen qatar, kúdiktiniń jubaıyna qatysty da jeke qylmystyq is qozǵalyp, tergeý júrgizilip jatyr. Onyń áreketteri QR Qylmystyq kodeksiniń 109-1-babynyń 2-bóligi 3-tarmaǵy — dármensiz kúıde bolǵan nemese materıaldyq ne ózge de táýeldilikte bolǵan adamǵa qatysty uryp-soǵý retinde saralandy. Otbasynyń kámeletke tolmaǵan balalary ýaqytsha týystarynyń qamqorlyǵyna berildi.
Eske sala keteıik, bul oqıǵa kórshilerdiń áleýmettik jelilerde jarııalaǵan beınejazbalarynan keıin qoǵamdyq rezonans týdyrdy. Kadrlarda qart adamǵa kórsetilgen fızıkalyq jáne psıhologııalyq zorlyq-zombylyq faktileri anyq baıqalady. Sondaı-aq beınematerıaldardan kelininiń bolǵan jaǵdaıǵa aralaspaǵany kórinedi.
Beınejazbalar jarııalanǵannan keıin materıaldar quqyq qorǵaý organdaryna joldanǵan. Alaıda sol ýaqytqa deıin zeınetker jerlenip qoıǵan. Osyǵan baılanysty máıitti eksgýmatsııalaý týraly sheshim qabyldanyp, ólimniń naqty sebebin anyqtaý úshin sot-medıtsınalyq saraptama taǵaıyndaldy. Saraptama qorytyndylary aıyptaý taraby úshin mańyzdy dálelderdiń biri bolyp, qylmystyq is boıynsha dáleldemelik bazany tolyqtyrady.
Budan buryn Túrkistan oblysynda ákesin uryp, qorlyq kórsetken turǵyn qamaýǵa alynǵanyn jazǵan edik.