Ákesiniń kelisiminsiz balany Qazaqstan azamattyǵynan shyǵaryp jibergen
«Qazaqstanda basqa memleketterdiń azamattary bolyp sanalatyn ata-analardyń kámeletke tolmaǵan balalarynyń azamattyǵyn aıqyndaýyna baılanysty týyndaǵan oqıǵalar ózekti máselege aınalyp keledi. Ata-ananyń arasynda nekeleriniń buzylýy kezinde tıisti kelisimge kelmegen jaǵdaıda atalǵan balalar osyndaı oqıǵalardyń qurbanyna aınalyp, bul fakti teris sıpatqa ıe bolady», - delingen ombýdsmen baspasóz qyzmetiniń habarlamasynda.
«QR azamattyǵy týraly» QR Zańynyń 12-babyna sáıkes, ata-anasynyń azamattyǵy ártúrli bolǵanda, ıaǵnı bala týǵan kezde olardyń bireýi Qazaqstan Respýblıkasynyń azamatyǵynda tirkelgen jaǵdaıda, QR aýmaǵynda týǵan bala Qazaqstan azamaty sanalady.
Kóptegen elderdiń zańnamasy kámelet jasyna deıin balanyń azamattyǵy ata-anasynyń bireýiniń azamattyǵy negizinde aıqyndalady, bul rette eki ata-ananyń arasyndaǵy senimhattar men sharttar nazarǵa alynady.
Bul turǵyda Ombýdsmenniń atyna Qazaqstan azamatynyń kámeletke tolmaǵan balasynyń múddesin qorǵaý maqsatynda jazǵan haty mysal bola alady. Belgili bolǵandaı, Qazaqstan aýmaǵynda týyp, bizdiń elimizdiń azamattyǵyn alǵan bala anasynyń áreketteri saldarynan, ıaǵnı ákesiniń kelisiminsiz jáne ony eskertpesten, Ýkraına azamatyna aınaldy. Anasy usynǵan málimetteri boıynsha Qaraǵandy oblysynyń quqyq qorǵaý organdary qos azamattyqqa jol berilmeýi týraly ulttyq zańnama normalaryn negizge ala otyryp, balany Qazaqstan azamattyǵynan aıyrý týraly sheshim qabyldaǵan.
Sarapshylardyń paıymynsha, osyndaı sheshimderdi qabyldaý kezinde shektes elderdiń ýákiletti qyzmetterimen yqtımal ózara is-qımyldardy jan-jaqty zerdeleý qajet.
Bul naqty oqıǵada quqyq qorǵaý organdary balany qazaqstandyq azamattyǵynan aıyrý týraly sheshim qabyldaǵan kezde jetkinshektiń ákesin habardar etpegen. Olar tek balanyń anasy usynǵan qujattardy negizge alǵan. Sonymen qatar, qos azamattyqqa tyıym salatyn ýkraınalyq zańnamanyń buzylǵanyn eskermegen.
Joǵaryda aıtylǵandar vedomstvoaralyq, onyń ishinde sheteldegi qazaqstandyq dıplomatııalyq ókildikpen tyǵyz ózara is-qımyl jasaý qajettigin baıqatady.
«Balalardy elden tys jerge kóshirý jáne olardyń shetel azamattyǵyn alý zańdylyǵy konsýldyq qyzmetterdiń erekshe nazarynda bolýy tıis. Ombýdsmenniń pikirinshe, azamattyń jasyna qaramastan, Qazaqstan azamattyǵynan shyqqan árbir oqıǵa tótenshe jaǵdaı retinde jan-jaqty qaralýy tıis», - dep jazdy apparat ókilderi.
Osyǵan baılanysty atalǵan máselelerdi quqyqtyq retteýdi jetildirý oryndy bolyp tabylady.
Jaǵdaıdyń mán-jaıyn anyqtaý maqsatynda Ýkraınanyń Joǵarǵy Radasynyń Adam quqyqtary jónindegi ýákiline, sondaı-aq QR Syrtqy ister mınıstrligine jáne Іshki ister mınıstrligine tıisti saýaldar joldandy.
