Ákesinen zorlyq kórdi degen sábıge qatysty is tergelip jatyr - polıtsııa
ALMATY. QazAqparat - Almaty qalalyq polıtsııa departamenti bastyǵynyń orynbasary Rýstam Ábdirahmanov «zorlanǵan» úsh aılyq qyzǵa qatysty túsinikteme berdi, dep habarlaıdy QazAqparat tilshisi.
Spıker óziniń Instagram-daǵy tikeleı efır kezinde qylmystyq isti Túrksib aýdandyq polıtsııa basqarmasy júrgizip jatqanyn aıtty.
«Qylmystyq is sotqa deıingi tergeýdiń biryńǵaı tizilimine 11 qyrkúıek kúni tirkeldi. Qazir saraptama taǵaıyndaldy. Aryz boıynsha tirkelgen qylmystyń iske sáıkes, kishkentaı bala úsh aılyq kezinde ákesinen zorlyq kórgen. Biz qazir bul jaǵdaıdy egjeı -tegjeıli tekserip jatyrmyz. Belgilengen saraptamalyq zertteý áli daıyn emes. Saraptamalyq mekemeniń talaby boıynsha saraptamaǵa birqatar maman tartyldy», - dedi Rýstam Ábdirahmanov.
Sonymen qatar, ol qylmysqa qatysy bar adamdar boıynsha jıi qoıylatyn suraqtarǵa jaýap berdi.
«Aıyptalýshylar Almatyda, qaladan eshkim eshqaıda ketken joq, bul adamdar úshin bultartpaý sharasy tańdalmady. Qazirgi ýaqytta eshkim ustalǵan joq, biz bárimiz saraptamanyń qorytyndysyn kútemiz. Ol áli daıyn bolǵan joq. Saraptamamen basqa vedomstvo aınalysady. Qorytyndy qandaı bolatynyn eshkim bilmeıdi. Barlyǵy óndiriste jáne baqylaýda», - dedi qalalyq polıtsııa ókili.
Buǵan deıin áleýmettik jeliler men birqatar buqaralyq aqparat quraldarynda Almatyda úsh aılyq náresteniń zorlanǵany týraly aqparat taraǵan bolatyn.
