Ákesine qonaqqa baryp, kórshisiniń malyn urlap otyrǵan - Túrkistan
TÚRKІSTAN. QazAqparat – Túrkistan oblysy Keles aýdanynyń polıtseıleri 100-den astam usaq maldy urlaǵan kúdiktini ustady. Ol jábirlenýshige 4 mln 295 myń teńge kóleminde shyǵyn keltirgen, dep habarlaıdy QazAqparat tilshisi.
Túrkistan oblystyq Polıtsııa departamentiniń baspasóz qyzmetinen málim etkendeı, mal ıesi polıtsııaǵa aǵymdaǵy jyldyń sáýir aıynan maýsymǵa deıingi aralyqta belgisiz tulǵa turǵyn-úıiniń janynda ornalasqan mal qorasynan 78 bas qoıy men 47 bas qozysyn jasyryn jymqyryp ketkeni jóninde aryzdanǵan. Jábirlenýshi urlanǵan qoılarynyń árqaısysy 40 myń teńge, al qozylary 25 myń teńge bolatynyn kórsetken.
Qylmysty ashý maqsatynda Keles APB-niń qyzmetkerleri jedel-izdestirý sharalaryn júrgizip, tártip saqshylary jaqyn aımaqtardy aralap kórip shyqty. Kýágerlerden surastyrǵan. Nátıjesinde, Saryaǵash aýdanynyń turǵyny kúdikti retinde ustaldy. Onyń úıinen aıǵaqty zat retinde 30bas qoı tárkilenip alyndy. Qalǵandaryn satyp, óz qajettiligine paıdalanǵany belgili boldy. Tergeý kezinde seziktiniń ákesi jábirlenýshiniń kórshisi bolǵany anyqtaldy. Ol osylaısha ákesiniń úıine baryp júrip, kórshiniń maldaryn úsh aı aralyǵynda urlap kelgenin aıtqan.
«Atalǵan jaıt sotqa deıingi tergep-tekserýdiń biryńǵaı tizilimine engizilip, QR QK-niń 188-baby boıynsha tirkeldi. Kúdikti óziniń is-áreketin tolyq moıyndadyn. Qazirgi tańda tergeý amaldary júrgizilýde», - delingen habarlamada.
