Ákesin óltirgen qostanaılyq boıjetken sot zalynan bosatyldy
QOSTANAI. QazAqparat - Óz ákesin óltirgen qostanaılyq boıjetken sot zalynan bosatyldy. Ol shartty túrde sottaldy, dep habarlaıdy QazAqparat tilshisi.
Qostanaı oblysynyń mamandandyrylǵan aýdanaralyq qylmystyq sotynyń baspasóz qyzmetinde málim etilgendeı, bastapqyda sottalýshy QR QK 99-baby 1-tarmaǵy (Kisi ólimi) boıynsha aıyptalǵan. Biraq, sot sheshimimen qylmystyq is QR QK 102-babymen (Qajetti qorǵaný shegin asyra paıdalaný kezinde jasalǵan kisi óltirý) qaraldy.
Osylaısha, kúdikti bir jylǵa shartty túrde sottaldy. Osy ýaqyt aralyǵynda probatsııalyq baqylaý ornatylady. Sottalýshy sot zalynda bosatyldy. Aıta keteıik, sot jabyq rejımde ótti.
Eske salsaq, qaıǵyly oqıǵa 2018 jylǵy 3 qańtarda Meńdiqara aýdanynda bolǵan. 17 jastaǵy qyz otbasylyq janjal barysynda ákesine pyshaq salǵan. Saldarynan ákesi oqıǵa ornynda kóz jumdy.
Foto: www.belnovosti.by
