Ákesi úsh jasar qyzyn órtten qutqaryp, ózi ajal qushty
QOSTANAI. QazAqparat - Qostanaı oblysy Meńdiqara aýdanynda turǵyn úı órtenip, eki adam qaza boldy, dep habarlaıdy QazAqparat oblystyq TJD baspasóz qyzmetine silteme jasap.
Qaıǵyly oqıǵa Meńdiqara aýdanynda bolǵan. TJD baspasóz qyzmeti jarııalaǵan aqparatqa súıensek, aýdan ortalyǵyndaǵy jeke turǵyn úı tolyǵymen janyp ketken.
«Otaǵasy jumystan kele jatyp, úıiniń órtenip jatqanyn kóredi. Dereý úıge júgirip kirip, úsh jasar qyzdy tysqa alyp shyǵyp úlgergen. Alaıda, ol ózin jáne jubaıyn tilsiz jaýdan aman alyp qala almady. Órttiń shyǵý sebebi de belgisiz. Ony anyqtaý úshin órtke qarsy zerthananyń qyzmetkerleri jumys istep jatyr», - delingen TJD baspasóz qyzmetiniń habarlamasynda.
