Ákesi ulymen birge sýǵa batyp ketti - Pavlodar oblysy
PAVLODAR. QazAqparat - Jergilikti turǵyndar Ertis ózenine batyp ketken 22 jastaǵy jigittiń denesin sýdan alyp shyqty, dep habarlaıdy Ravlodarnews.kz.
Bul týraly oblystyq TJD baspasóz qyzmeti málim etken.
- 1 tamyz kúni Ertis ózeniniń Syntas aýylynan bes shaqyrym jerdegi jaǵalaýynda otbasymen birge demalýǵa kelgen ákesi men uly sýǵa batyp ketti, - deıdi departamentte. - Oqıǵa ornyna kelgen órt sóndirý jáne avarııalyq-qutqarý jumystary qyzmeti jedel qutqarý jasaǵynyń súńgýirler toby 1973 jyly týǵan úı ıesin izdeý jumystaryn áli jalǵastyryp jatyr.
TJD aımaq turǵyndary men qonaqtaryna oblystyń bas memlekettik sanıtarlyq dárigeri Batyrbek Álıevtiń №8 qaýlysynyń 10-shy tarmaǵyna sáıkes óńirdiń qoǵamdyq jaǵajaılarynyń qyzmetine tyıym salynǵanyn eske salady.
Departamenttiń qurylymdyq jáne aýmaqtyq bólimsheleriniń qyzmetkerleri kún saıyn shomylýǵa tyıym salynǵan jerlerde reıdter júrgizedi. Resmı kommýnaldyq jaǵajaılardyń karantın kezinde jabylýyna baılanysty oblys ortalyǵynyń turǵyndary Ýsolka ózeniniń sol jaǵalaýynda, Ertistiń jyly aǵysynda, shoferler jaǵajaıynda, «Zelenaıa roşa» demalys bazasynyń janynda shomylýdy ádetke aınaldyrdy. Bul oryndar shomylýǵa tyıym salynǵan jáne munda shomylý ólimge ákep soqtyrýy múmkin.
