Ákesi taspen uryp komaǵa túsken bala aýrýhanadan shyqty
ALMATY. QazAqparat - Almatyda aǵash túbinen aýyr jaraqatpen tabylǵan 4 jastaǵy bala aýrýhanadan shyqty. Bul týraly QazAqparat tilshisine qalalyq №2 balalar aýrýhanasynyń ókilderi habarlady.
«Bala keshe nevrologııa bóliminen shyǵaryldy. Jaǵdaıy jaqsy bolǵan soń úıine jiberildi», - dedi aýrýhana ókileri.
Dárigerler balaǵa 3-6 aı arasynda bas súıeginiń samaı tusyn qaıta qalpyna keltirýi kerektigin jáne oǵan taǵy da ota jasalatyndyǵy týraly aıtty.
Emhanadan shyqqan búldirshin qazir ózdiginen tamaq iship, sóıleı alady.
Al onyń ákesi Murat Asqaroglyǵa qatysty tergeý amaldary áli jalǵasyp jatyr. Er adam balasyn taspen urǵanyn moıyndady.
Aıta ketý kerek, jantúrshigerlik oqıǵa 16 shilde kúni Almatydaǵy shyǵys aınalma jolyna jaqyn Brıanskaıa kóshesinde bolǵan. 4 jasar bala aýyr jaǵdaıda aǵash túbinen tabylǵan bolatyn.
