Ákesi men jalǵyz ulynan aıyrylǵan jetisýlyq joǵarydaǵylardan ádildik suraıdy
TALDYQORǴAN. KAZINFORM — Jetisý oblysynda eki adamnyń ómirin qıǵan jol-kólik oqıǵasyna qatysty is 4 aıǵa sozylǵan. Qaza bolǵandardyń týystary bul iske kúmánmen qaraıdy. Polıtsııa departamenti saramtama taǵaıyndalǵanyn aıtty.
Oqıǵa 2024 jyldyń 18 shildesinde «Almaty-Óskemen» tas jolynda bolǵan.
Alakól aýdany jaqtan kele jatqan Mazda-626 avtokóligi qarsy baǵytta kele jatqan Faton júk kóligimen soqtyǵysqan.
Saldarynan jeńil kóliktiń rólindegi 73 jastaǵy qarııa men onyń 17 jastaǵy nemeresi oqıǵa ornynda kóz jumǵan.
Jábirlenýshi taraptyń aıtýy boıynsha jol-kólik oqıǵasyn tirkegen jergilikti polıtsııa qyzmetkerleri qaıtys bolǵan azamattardyń qaraly habaryn arada tek 4 saǵat ótkennen keıin ǵana jetkizgen.
Uly men ákesinen aıyrylǵan sarqandyq Nurlybek Álimbaı bul jerde bir shıkilik bar dep otyr.
«Kúmánim bar. Óıtkeni kisi qaıtys bolǵan kezde eki jaqtyń adamdaryn shaqyryp kórý kerek edi. Olar 4 saǵat ýaqytty joǵaltyp, ábden tazalap, bárin rettep bolǵannan keıin habarlasyp otyr. Mine, 4 aı ýaqyt boldy. Osy aralyqta quqyq qorǵaý organdarynan eshqandaı habar joq. Bári belgili nárse. Qaıda baryp, kimnen suraıtynymyzdy bilmeımiz», — dedi Nurlybek Álimbaı.
Іstiń osy ýaqytqa deıin sozylǵanyn Jetisý oblysy polıtsııa departamentiniń qyzmetkerleri jol- kólik oqıǵasy jáne tehnıkalyq jaǵdaı saraptamasynyń júrgizilip jatqandyǵymen baılanystyrady. Júk kóliginiń júrgizýshisinen de jaýap alynǵan. Tergeý isteri júrip jatqandyǵyn alǵa tartyp, quqyq qorǵaý ókilderi budan ózge aqparat berýden bas tartty.
«18 shildede «Almaty-Óskemen» tas jolynyń 447-shaqyrymynda mazda avtokóligi men Faton júk kóliginiń soqtyǵysy bolǵan. Eki adam qaıtys body. Qylmystyq is QR 345-baby 4- bóligi boıynsha qozǵaldy. Qazir tıisti saraptamalar taǵaıyndaldy. Sonyń qorytyndysy boıynsha protsessýaldyq sheshim qabyldanady. Іs polıtsııa departamentiniń qatań baqylaýynda. Osy aıdyń aıaǵyna deıin sheshim qabyldaımyz», — dedi Polıtsııa departamentiniń aǵa anyqtaýshysy Baýyrjan Taılaqbaev.
Nurlybek Álimbaı oqıǵanyń naqty qalaı bolǵanynan arada 4 aı ótse de áli de beıhabar. Jalǵyz uly men qart ákesin jer qoınyna tapsyrǵan ol endi joǵarydaǵylardan ádildik suraıdy. Eske salaıyq, buǵan deıin Jetisý oblysynda jol-kólik oqıǵasy bir jylda 3 esege óskenin jazǵanbyz.
