Ákesi aýrýhanada qaıtys bolǵan soń dárigerlerdi uryp-soqqan eki kúdikti ustaldy
Almaty oblysynyń polıtsııa qyzmetkerleri Talǵar aýrýhanasynda dárigerlerdi uryp-soqqan eki kúdiktini ustady, dep habarlaıdy QazAqparat tilshisi.
Almaty oblystyq polıtsııa departamenti málim etkendeı, 19 qyrkúıek kúni saǵat 10:35 shamasynda Talǵar aýdandyq polıtsııa basqarmasynyń kezekshi bólimine aýrýhananyń 27 jastaǵy reanımatology men 21 jastaǵy medıtsına qyzmetkerin belgisiz bireýler uryp-soqqany týraly habar túsken.
«Bul derek QR QK 106-baby 2-bóligi boıynsha aýdan polıtsııasynda tirkeldi. Jedel izdestirý sharalary barysynda Talǵar aýdanynyń polıtsııa qyzmetkerleri 1987 jyly týǵan Sh. jáne 1994 jylǵy N. esimdi kúdiktilerdi anyqtap, qolǵa túsirdi. Qazirgi ýaqytta oqıǵanyń búkil mán-jaıyn jan-jaqty, tolyq jáne obektıvti zertteý úshin saraptama taǵaıyndalyp, tergeý júrip jatyr», - dedi Almaty oblysy PD bastyǵy Baýyrjan Álenov.
Ózge aqparat QR QPK 201-baby aıasynda jarııalanbaıdy.
Eske salaıyq, keshe Talǵar aýdandyq aýrýhanasynda ákesiniń qaıtys bolǵanyn estigen uldary medıtsına qyzmetkerlerin uryp-soǵyp, marqumnyń denesin urlap ketken edi.
Keıin Densaýlyq saqtaý mınıstrligi atalǵan oqıǵaǵa pikir bildirip, dárigerlerdi soqqyǵa jyqqandardyń jazalaýdy talap etti.