Ákemniń úlken aǵasy Rjev túbindegi qandy shaıqasta qaza tapty – Qasym-Jomart Toqaev
«Ákemniń úlken aǵasy Rjev shaıqasynda qaıtys boldy. Ol jerde ózderińiz biletindeı, Ekinshi dúnıejúzlik soǵystyń eń qandy shaıqastarynyń biri bolǵan edi. Meniń aǵam Tver oblysy Rjevskıı aýdany Trýbıno aýylyndaǵy maıdangerlerdiń zıratynda jerlendi. Aleksandr Tvardovskııdiń: «Men Rjevtiń túbinde óldim, baqytty bolýdy sizderge buıyryp, Otanǵa adal bolýdy tapsyrdym, óliler ketse de, ketken joq kúıinip, bizde bir uly baqyt bar - Otan úshin quladyq, ony biz qutqarý úshin qıyldyq» degen óleńi esterińizde bolar», - dedi Prezıdent «MIR» arnasyna bergen suhbatynda.
Memleket basshysy ákesin de, kókesi Qasymdy da otbasy bolyp eske alatynyn, beıbit ómir úshin maıdanda máńgi qalǵan batyrlardyń bári umytylmaıtynyn aıtyp ótti.
«Meniń esimim de sol Qasym kókemniń qurmetine qoıylǵan. Meniń ákem orny tolmas qazasyna qabyrǵasy qaıysyp, úlken aǵasynyń rýhyna qurmet kórsetti. Ákem ony qatty saǵyndy, barlyq hattar men fotolardy saqtap, ómir boıy jerlengen jeri týraly kez-kelgen aqparatty tabýǵa tyrysty. Keıde ákem aǵasynyń qaıta tirilip keletininen de úmittenetin sııaqty kórinetin maǵan», - dep qosty Memleket basshysy.
Alaıda Prezıdenttiń aıtýynsha, Rjev túbindegi shaıqasqa qatysty qujattar da qupııa saqtalǵan.
«Reseıdiń Qorǵanys mınıstrliginiń Podolskidegi muraǵaty 2000 jyldyń ortasynda ashylǵan kezde ǵana biz onyń jerlengen jerin bildik. Men Almatydaǵy ákemniń qabirinen topyraq alyp, Trýbıno aýylyndaǵy qabirge bardym. Ulym menimen birge boldy. Mine, sol baýyrlastar qabirine ákemniń qabirinen ákelingen topyraqty septim. Sodan keıin men aǵamnyń qabirinen topyraqty Almatyǵa apardym «, - dedi Prezıdent.
