Ákemdi maqtan etemin: KAZ Minerals Bozshakol qyzmetkerleriniń balalary ata-analarynyń jumys ornymen tanysty
ASTANA. KAZINFORM - KAZ Minerals Bozshakol kenishinde alǵash ret Otbasy kúni atalyp ótti. Mereke aıasynda Pavlodar, Ekibastuz ben Astanadan kelgen 73 bala óndiris kesheninde boldy, dep habarlaıdy Kazinform tilshisi.
Balalar Qazaqstandaǵy eń iri mys óndiretin kenishtiń jumysyn óz kózderimen kórdi. Olarǵa karer, dıspetcherlik pýlt, sýlfıdtik fabrıka jumysy tanystyrylyp, jumysshy ashanasynda dastarhan jaıyldy. Bıiktigi úsh qabatty úıge teń alpaýyt júk kóligin kórgen balalardyń tańdanysynda shek bolmady. 12 jasar Ýlıana buǵan deıin de júkti ózi tógetin kólikti sýretten kórgenin, biraq onyń mundaı úlken bolaryn oılamaǵanyn jasyrmady.
Sondaı júk kólikteriniń birin 10 jyldan beri tizgindep kele jatqan Vadım – Ýlıananyń ákesi. Ol kúndizgi-túngi aýysymmen jumys isteıdi.
Ken óndiretin tehnıka 11 jasar Dıasqa de erekshe áser qaldyrdy. Onyń ákesi – «óte keremet kásiporynda» jumys isteıtin avtomatıka jáne ólsheý-baqylaý qyzmetiniń mamany. Alyp mashınalardy kórgen Dıas óskende osynda jumys isteýge sheshim qabyldady.
- Qaýipsizdik – KAZ Minerals úshin basty qundylyq, sol sebepti biz bul sharany uıymdastyrýǵa erekshe mán berdik. Qonaqtardyń jasyn shektep, 10 men 14 jas aralyǵyndaǵy balalardy shaqyrdyq. Sebebi bul jastaǵy jetkinshekter óndiris ornynda saqtyqtyń qanshalyqty mańyzdy ekenin túsinedi, - deıdi KAZ Minerals Bozshakol oqytý jáne damytý bóliminiń jetekshisi Jasulan Jumashev.
Merekeniń eń áserli sáti – 10 jasar Gúlsezimniń jumys aýysymyndaǵy ákesin kóre almaıtynyn bilgende kózine jas alǵany. Jaǵdaıdy túsingen kásiporyn jetekshileri Dosymhan Otamuratovty jumystan bosatyp, qyzymen qaýyshýǵa múmkindik berdi.
- Ol meni aýysym aıaqtalǵansha, ıaǵnı taǵy bir apta kórmeımin dep oılapty. Kelgenimde tas qylyp qushaqtap jibermeı qoıdy, - dep kúldi 10 jyldan beri saz óńdeý fabrıkasynda flotator bolyp jumys isteıtin Dosymhan Otamuratov.
KAZ Minerals Bozshakol kenishiniń dırektory Malık Inkıjekov bul sharanyń basty maqsaty – balalarǵa jumysshy mamandyqtarynyń qundylyqtaryn túsindirý ǵana emes, sonymen qatar otbasylyq baılanysty da nyǵaıtý ekenin atap ótti.
- Búgin Bozshakol kenishinde erekshe is-shara – qyzmetkerlerdiń otbasylaryna arnalǵan ekskýrsııa ótti. Biz ony Kenshiler kúni men Jumysshy mamandyqtary jylyna arnadyq. Balalar men ata-analar karer men fabrıkalardy aralap kórdi, rýdanyń mys kontsentratyna aınalǵanynyń kýási boldy. Maqsat – jetkinshekterge ata-analarynyń jumys ornyn kórsetý, nátıjege jetý úshin qansha eńbektený kerektigin túsindirý jáne otbasynyń baılanysyn kúsheıtý, - dep málimdedi Malık Inkıjekov.
Kompanııa Otbasy kúnin atap ótýdi dástúrge aınaldyrýdy josparlap otyr.
