Ákem men inimdi qastandyqpen emes, qatelikpen óltirip aldym - sottalýshy
AQTÓBE. QazAqparat - Qylmystyq kodekstiń «Adam óltirý» baby boıynsha sottalyp jatqan Medet Tapaev búgin sotta sońǵy sózin aıtty. Ol ózine qatysty 23 jyl bas bostandyǵynan aıyrý jazasyn jeńildetýdi surap otyr, dep habarlaıdy QazAqparat tilshisi.
Aqtóbede 39 jastaǵy Medet Tapaev bir túnde ákesi men inisin pyshaqtap óltirgen bolatyn. Buǵan deıin habarlaǵanymyzdaı, qylmysker mas kúıinde úıine kelip, kelinshegine tamaq pisirtken. Sol kezde balaǵattap, sóılep, úı ishindegi ata-anasy men baýyrlaryn oıatady. Buny qylyǵyna shydamaı, ashýǵa býlyqqan ákesi Serik Tapaev qolyna túsken kóseýmen ulyn uryp, ekeýi janjaldasady. Medet Tapaev bolsa sol túni ákesi men inisi Manas Tapaevty óltirgen .
Búgin sottalýshy Medet Tapaev otyrysta sońǵy sózin aıtty.
«Maǵan taǵylǵan jazany jeńildetýdi suraımyn. Barlyǵynan keshirim suraımyn. Qastandyqpen emes, qatelikpen qylmys jasadym. Júregim qysylyp, demikpe dertine shaldyqtym. Aýyryp júrmin, ýaıymnan. Meniń bar oıym anama kelin ákelip, baqytty ómir súrý edi. Biraq qatelik jasadym. Aldaǵy ýaqytta jumys istep, anama kómektesýdi oılaımyn. Jazany jeńildetýdi sottan suraımyn»,- dedi sottalýshy Medet Tapaev.
Aıta keteıik, memlekettik aıyptaýshy sottalýshy Medet Tapaevtyń jazasy óte aýyr ekenin aıtyp, 23 jyl bas bostandyǵynan aıyrýdy, ishimdikten májbúrli túrde emdetýdi surady.
