Ákem «qazaq pen grek - máńgilik aǵaıyn» degendi qulaǵyma quıyp ósirdi - grek boıjetkeni
«Bolashaq jýrnalıst retinde men kez kelgen jerdegi saıası oqıǵalarǵa kýá bolýǵa tyrysamyn. Álemdik BAQ bizdiń Elbasynyń eńbegin erekshe atap ótetinin bilemin. Grekııadaǵy Poros aralynda bolǵanymda jergilikti qaýymdastyq keńesiniń múshesimen kezdesip qaldym. Qazaqstannan kelgenimdi bilgen ol «Grekııada bári bar. Tek bizge Nursultan Nazarbaev jetispeıdi» degen edi. Al meniń repressııaǵa ushyraǵan ájem bala kezde qazaq balasy shelpek berip, ashtyqtan qalaı qutqaryp qalǵanyn aıtyp otyratyn. Ákem de meni «qazaq pen grek - máńgilik aǵaıyn» degendi qulaǵyma quıyp ósirdi», - deıdi Mılına Vavýlıdı QHA-nyń 27-shi sessııasynda.
Grek boıjetkeni óz sózinde Prezıdent ókilettigin tapsyrady degen aqparatty estigen kezde kóz jasyna erik bergenin aıtady.
«Álem elderinde qandaı qaqtyǵystar bolyp jatatynyna kýámiz. Bizdiń elde bári tynysh bolsyn dep tileımiz. Dana ári myqty sizdeı tulǵanyń sheshimine tánti boldyq. Biz sizden úlken sabaq - Otandy qalaı súıý kerektigi týraly tálim aldyq», - deıdi ol.
Boıjetken Qazaqstan halqy Assambleıasy týraly dıplom jumysyn qorǵaǵaly jatqanyn tilge tıek etti.
«Bolashaq jýrnalıst retinde Qazaqstandaǵy beıbitshilik pen kelisimdi saqtaýda jaýapkershilikti tolyqqandy sezinemin», - deıdi Mılına Vavýlıdı.
Eske sala ketsek, elordada QR Tuńǵysh Prezıdenti - Elbasy, Qazaqstan halqy Assambleıasynyń Tóraǵasy Nursultan Nazarbaevtyń tóraǵalyǵymen Qazaqstan halqy Assambleıasynyń XXVII sessııasy ótkizildi. Beıbitshilik jáne kelisim saraıynda ótken sessııaǵa 1 500-den astam adam jınaldy. Olardyń ishinde búkil óńirlerden kelgen Assambleıa músheleri men ardagerleri, respýblıkalyq jáne óńirlik etnomádenı birlestikter tóraǵalary, Parlament depýtattary, ortalyq atqarýshy organdardyń, saıası partııalardyń, dinı birlestikterdiń, úkimettik emes uıymdardyń basshylary, joǵary oqý oryndarynyń rektorlary, shet memleketterdiń dıplomatııalyq mıssııalarynyń, ǵylymı, shyǵarmashyl zııaly qaýym jáne BAQ ókilderi boldy.
