Ákem esimimdi taý ústinde otyrǵanda qoıǵan - Mynataýbıik Ánesov
ASTANA. QazAqparat - Búginde Mynataýbıik Ánesov «Aýyl» partııasynyń Batys Qazaqstan oblystyq fılıalyn basqaryp júr. Partııanyń kezekten tys XIV sezine kelgen ol QazAqparat tilshisine óz esiminiń tarıxyn aıtyp berdi.
Aǵamyzdyń týǵan jeri - Batys Qazaqstan oblysynyń Bókeı ordasy aýdany. Ol jaqta Ájen degen aýyl bar. Ákesi - Taýpıq soǵysqa 1942-shi jyly attanyp, bes jyldan keıin aman-esen úıge oralǵan. Ózi aqynjandy ári sýret salýǵa sheber boldy.
«Bizdiń jaqta Mynataý degen tóbe bar. Endi, ol taý emes, soǵan jaqyn bir tóbe. Ákem sol tóbeniń ústinde dostarymen jıi jınalyp otyratyn. Men dúnıege keletin kezde sol jerde otyrǵan ǵoı. Sonda ákem «Meniń áıelim ul týsa, Mynataýbıik dep qoıamyn» deıtin kórinedi. Óziniń aty Taýpıq qoı, Taýbıikke uqsaıdy. Soǵan keltirip, Mynataý da bıik bolsyn dep, taýdyń atyn ózgertken. Bir jaǵynan balam bıik shyńǵa shyqsyn dep tiledi. Sodan ol esim qaldy. Qaıda barsam da, esimimdi suraıdy, «Mynataýbıik» dep aıtamyn. Túsinbegenderge jazyp beremin. Qujatty da ózgertken joqpyn. Resmı túrde solaı qaldy», - deıdi M.Ánesov.
Qazirgi kezde Mynataýbıik Taýpıquly Oral qalasynda turady. Birneshe balasy bar. Biraq erekshe at qoıý dástúrin jalǵastyrmady. Ulynyń esimi - Nurjan. Nemeresi - Almas. Al jıeniniń aty - Mıras. Mynataýbıik aǵamyz zeınetke shyqsa da, «Aýyl» partııasynda jumys istep keledi. «2000 jyldan bastap on bes jyl boıy Qazaqstan patrıottar partııasyn basqardym. Odan keıin eki partııa qosylǵasyn, orynbasary boldym. Sosyn ótkende saılaý ótti. Sonyń qorytyndysy boıynsha «Aýyl» partııasynyń Batys Qazaqstan oblystyq fılıalynyń tóraǵasy bolyp saılandym», - dep atap kórsetti M.Ánesov.
Aıta keteıik, búgin Astanada «Aýyl» xalyqtyq-demokratııalyq patrıottyq partııasynyń kezekten tys XIV sezi ótti. Kún tártibinde prezıdıým quramyna ózgeris engizý jaıy talqylandy. Al partııa tóraǵasy Álı Bektaev «Bolashaq» baǵdarlamasy boıynsha aýyl jastaryn kóbirek oqytý máselesin kóterdi.
Foto: oraloniri.kz
