Ákeli-balaly Ýıll Smıt pen Djeıden Smıt «júldege» qaryq boldy
ASTANA. QazAqparat - AQSh-ta 2013 jyldyń kıno salasyndaǵy eń nashar jetistikteri úshin 34-shi "Altyn tańqýraı" antısyılyǵy tabys etildi, dep habarlaıdy Kinostan.kz.
"Bizdiń zamannan keıin" fantastıkalyq boevıgine túsken ákeli-balaly Ýıll Smıt pen Djeıden Smıt "Altyn tańqýraıdyń" úsheýin bir-aq alyp "qaryq" boldy: Djeıden - "Nashar akter", Ýılldiń ózi - "Ekinshi plandaǵy nashar akter" atansa, ekeýi birigip "Nashar ekrandyq dýet" ataǵyna ıe boldy. Al fılmderdiń ishinen "Mývı 43" kınonovellasy antısyılyq alýdan kóshbasshy atandy: kóptegen Gollıvýd juldyzdarynyń basyn qosqan komedııa "Nashar fılm", "Nashar stsenarıı", "Nashar rejıssýra" atalymdaryna saı dep tanyldy. "Medeıanyń Rojdestvosy" ("A Madea Christmas") fılminde áıeldiń rólin oınaǵan akter Taıler Perrı "Nashar aktrısa" dep baǵalandy. Kımberlı Kardashıan "Arbaý: Otbasy keńesshisiniń syry" ("Temptation: Confessions of a Marriage Counselor") dramasyndaǵy rólimen "Ekinshi plandaǵy nashar aktrısa" atalymynda eshkimge «des bermedi». "Jalǵyz reındjer" - "Nashar remeık" dep tanyldy. "Altyn tańqýraı" 1980 jyldan beri ótkizilip keledi. Antısyılyq ıegerlerin "Altyn tańqýraı" qorynyń 800 múshesi jáne Rotten Tomatoes kınoretsenzııalar saıtynyń 80 myńdaı qoldanýshysy daýys berý arqyly tańdaıdy. Ádette bul antısyılyqtyń ıegerlerin "Oskar" marapattaý sharasyna 1 kún qalǵanda jarııalaıdy. Bıylǵy 86-shy "Oskar" marapattaý sharasy Astana ýaqytymen 2014 jylǵy naýryzdyń 3-i kúni tańǵy saǵat 6 shamasynda ótpek.
