Ákelerdiń balasyn mýzeıge alyp keletini qýantady – áskerı mýzeı basshysy
ASTANA. KAZINFORM – Búgin elimizde – otbasy kúni! Otandy súıý otbasynan bastalady. Osy oraıda áskerı otbasydan shyqqan, astanalyq kapıtan Dáýlet Qadyrov áskerı qyzmetke qalaı kelgenin aıtyp berdi.
Dáýlet Qadyrov Abaı oblysy Aqsýat aýdanynyń týmasy. 2015 jyly Astanadaǵy L. Gýmılev atyndaǵy Eýrazııa ýnıversıtetin «Týrızm menedjeri» mamandyǵy boıynsha támamdaǵan. Sol JOO-da áskerı kafedrany qosa aıaqtap, 2015 jyly QR Qarýly kúshteri Ulttyq áskerı-patrıottyq ortalyǵy áskerı-tarıhı mýzeıge jumysqa ornalasqan. Qazir sol mýzeıdiń basshysy.
«Qyzmetimdi ekskýrsııa júrgizýshi bolyp bastadym. 2015 jyly resmı ashylý saltanatynda burynǵy Prezıdentke mýzeı jumysyn tanystyrdym. Qazir áskerı-tarıhı mýzeıdiń bastyǵymyn. Jumysqa konkýrspen qabyldandym, 20-dan astam úmitkerdiń ishinen tańdaý maǵan tústi. Meni qabyldaǵannan keıin eki aptadan soń mýzeıdiń resmı ashylý saltanatynda tuńǵysh Prezıdentke ekskýrsııa júrgizetinimdi aıtty. Árıne, qobaljydym, úlken jaýapkershilikti sezindim. Al qazir bizdiń mýzeı elimizdegi áskerı-tarıhı baǵyttaǵy tuńǵysh ári jalǵyz mekeme», - dedi Dáýlet Qadyrov agenttik tilshisimen suhbattasa otyryp.
Onyń aıtýynsha, áskerı-patrıottyq is-sharalar óskeleń urpaqty otandy súıýge tárbıeleýde mańyzdy. Mýzeıdiń maqsat, mindeti de sol – jas urpaqty patrıot bolýǵa baýlý.
«Kókiregi oıaý, rýhy bıik urpaq qana máńgilik eldiń negizi bola alady. Meni ata-anam bala kúnimnen adamı qasıetti joǵaltpaý kerektigin aıtyp, adal qyzmet etýge tárbıelep, ósirdi», - deıdi ol.
Áskerı mýzeı basshysynyń arǵy atalary otan aldyndaǵy boryshyn adal ótep, maıdanǵa barǵan.
«Arǵy atam bilikti usta bolǵan, ol soǵysqa (ekinshi dúnıejúzilik) barmaı tylda ustalyq sheberlikpen aınalysty. Ózińiz biletindeı, tylǵa qara jumys kúshi kerek boldy. Biraq, arǵy atamnyń týǵan aǵasy soǵysqa attanyp, sol jaǵynan iz-túzsiz joǵalyp ketti. Óz atam Qadyr maıdanǵa barmaǵan, sebebi ol jas boldy. Al atamnyń baýyry Áshimdi 17 jasynda soǵysqa alyp ketedi, ol kisi de Berlınge deıin jetip, elge aman-saý oraldy. Ákem Tóleýtaı Erǵazın KSRO kezinde Qyrǵyzstanda eki jyl áskerı mindetin ótegen. Keıin Semeı qalasyndaǵy áskerı qalashyqta áskerı qyzmetshi bolyp eńbek etti, qazir zeınette. Soǵan qaramastan sol azamattyq áskerı mindetin atqaryp júr. Ákemdi, otbasymdy maqtan tutamyn. Odan bólek, ákemniń týǵan inisi, aralary bir jas Asqar Erǵazın Aýǵan soǵysyna qatysqan. Negizi ákem men baýyryn bir maıdanǵa bir ýaqytta alyp ketken, áskerılerdi bólý kezinde ákemniń inisi Asqar Aýǵanstanǵa baratyn bolady. Sodan soń ákem baýyryn maıdanǵa qımaı, komandırlerden meni jiber dep suraıdy, biraq buıryq shyǵyp qoıǵandyqtan ákeme ruqsat bermeıdi. Onyń ústine otbasynyń eki múshesin bir jerge jiberýge bolmaıtyn bolyp shyqqan. Osylaısha ákemniń inisi Asqar aýǵan soǵysynda (1985-1987 jj) barlaýshy bolǵan, aǵam elge aman-saý oraldy. Mine, meniń otbasymnyń áskerı qyzmeti osylaı bastaldy», - dep esine aldy áskerı maman.
Sondaı-aq, kapıtan D. Qadyrovtan bos ýaqytyn qalaı ótkizetinin suraǵan edik.
«Salaýatty ómir saltyn ustanamyn, árıne onyń kepili sport. Odan bólek, gıtaramen án aıtqan unaıdy. Gıtara shertip ándetetinim bar. Sonymen qosa KVN oınaıtyn ónerim de bar. Mektep kezinen ázilkesh qoıylymdarǵa qatysyp, keıin stýdent kezimizde bizdiń «Kúltegin» quramasy 2015 jyly «Jaıdarman» oıyn-saýyq jarysynyń jeńimpazy atandy. Jalpy shyǵarmashylyqqa bala kúnimnen jaqyn boldym», - deıdi ol.
Áskerı-tarıhı mýzeı basshysyn mansap qyzyqtyrmaıdy, maqsaty – elge qyzmet etip, paıdaly bolý.
«Búgin otbasy kúni, bul mańyzdy, sebebi otandy súıý otbasynan bastalady. Meni qýantatyny ákelerdiń balalaryn bizdiń mýzeıge jıi alyp keletini. Bul jer áke men balanyń ýaqyt ótkizetin meken bolǵanyna razymyn», - deıdi Dáýlet Qadyrov.
