Ákeler júgirip, analar velosıped tepti: Astanada 100-ge jýyq otbasy jarysty
ASTANA. KAZINFORM — Astanada Otbasy kúnine oraı «OTBASY DUATLON 2026» otbasylyq jarysy onynshy ret ótti, dep habarlaıdy elorda ákimdiginiń resmı saıty.
2016 jyldan beri uıymdastyrylyp kele jatqan saıysqa qatysýshylar 4,2 shaqyrymdyq qashyqtyqty júgirý men velojarys arqyly eńserip, balalar úsh jas sanaty boıynsha baq synady.
Otbasylyq dýatlonnyń bıylǵy básekesinde balalar úshin úsh sanat (8-9, 10-11 jáne 12-13 jas) belgilendi. Jalpy uzyndyǵy 4,2 shaqyrym qashyqtyqty quraıtyn otbasylyq saıysta aldymen ákeler 2 qashyqtyq júgirýmen bastasa, odan ári estafetany velosıpedke mingen analar (2 shaqyrym) aldy. Jarysty balalar márege deıin 200 metr júgirýmen aıaqtady.
— Búgingi sporttyq is-sharamyz «Otbasy kúnine» oraı uıymdastyrylyp jatyr. Qatysý tegin jáne osy is-shara arqyly otbasylyq qundylyq nasıhattalady degen senimdemin. Jeńimpazdar 3 sanat boıynsha anyqtalady jáne olarǵa syıaqy retinde turmystyq tehnıkalar beriledi. Saıysqa qatysqan otbasylardyń lotereıa arqyly velosıped utyp alýǵa da múmkindigi bar, — dedi Sporttyq-buqaralyq is-sharalardy ótkizý dırektsııasy basshysynyń orynbasary Erjigit Óserbaı.
«OTBASY DUATLON 2026» jarysy onynshy márte ótkizilip jatyr. Saıysty balasy 8-9 jas sanatyna kiretin otbasylar bastady. Bul jerde bıatlonshylar otbasy, Týrın jáne Vankýver Olımpıadasynyń qatysýshysy, bıatlonnan 4 dúrkin qysqy Azııa oıyndarynyń jáne eki dúrkin Azııa chempıony Aleksandr Chervıakov pen Anna Lebedevatan quralǵan komanda márege jeke-dara jetti.
— Astana qalasynda otbasyǵa arnalǵan dýatlon jylyna bir márte uıymdastyrylady. Otbasy kúnine oraı ótetin sharaǵa Aqmola oblysy, Aqkól qalasynan kelsek te, eń bastysy ózimizdiń balalarǵa motıvatsııa bersek deımiz. Sebebi, balalar bizdiń sózimizdi emes, is-áreketimizdi qaıtalaıdy. Jalpy osy sharaǵa ekinshi márte qatysyp jatyrmyz. Byltyr kúmis júldege ıe bolsaq, osy joly altyn júldege qol jetkizdik. Shynymyzdy aıtsaq, arnaıy daıyndaldyq dep aıta almaımyz. Ózimiz bapker bolǵandyqtan, kúndelikti 80-ge jýyq balanyń daıyndyǵyna kóńil bólemiz. Al osyndaı shara arqyly ózimizdiń 6 balamyzǵa úlgi kórsetýge tyrysýdamyz jáne búgin 8-9 jas pen 12-13 jas sanatynda qatysýǵa sheshim qabyldadyq, — dedi qatysýshy Anna Lebedeva.
Jeńimpazdardy marapattaý jáne quttyqtaý saltanaty lotereıa utysymen jalǵasty. Jarysqa qatysýshylar arasynda tirkeý nómirleri boıynsha lotereıada 10 velosıped oınatyldy.
Buǵan deıin Astanada turǵyndarǵa tegin zańgerlik kómek kórsetilgenin jazǵanbyz.
