«Ákeler odaǵy» tsıfrlyq dáýirdegi ákeniń róli jaıly talqylady
ASTANA. KAZINFORM – Respýblıkalyq «Ákeler odaǵy» qoǵamdyq birlestigi tóraǵasynyń orynbasary, Astana qalalyq fılıalynyń tóraǵasy Bekdaıyr Kúzembaı ákeler ınstıtýtynyń qoǵamdaǵy róli men otbasy qundylyqtaryn nyǵaıtý baǵytyndaǵy jumystar týraly oı bildirdi.
Ol sóz basynda respýblıkalyq «Ákeler odaǵy» qoǵamdyq birlestigi alǵash ret 2011 jyly bastama retinde qurylǵanyn, 2012 jyly Qazaqstan Respýblıkasy Ádilet mınıstrliginde resmı tirkeýden ótkenin, sodan beri uıym zańdy túrde qyzmetin jalǵastyryp kele jatqanyn aıtty.
- Onyń Astana qalalyq fılıaly 2023 jyly ashyldy. Bul bastama «Halyqaralyq ákeler kúnine» baılanysty kóterilgen. Maýsym aıynyń úshinshi jeksenbisinde atap ótiletin mereke. 2023 jyly Astana qalalyq fılıaly qurylyp, óz jumysyn bastady. Uıymnyń negizgi maqsaty – ákelerdiń qoǵamdaǵy rólin arttyrý.
Sonymen qatar jas urpaqty otansúıgishtikke tárbıeleý, ata-anany qurmetteýge baýlý, qorshaǵan ortaǵa janashyrlyqpen qaraý jáne tabıǵatty aıalaý sııaqty qundylyqtardy nasıhattaý da uıym qyzmetiniń mańyzdy baǵyttarynyń biri, – deıdi Bekdaıyr Kúzembaı.
Sózin jalǵaı otyryp, «Ákeler kúni» Qazaqstanda Úkimet qaýlysymen 2023 jyly bekitilgen bolatynyn, bıyl bul mereke elimizde úshinshi ret atalyp ótetinin tilge tıek etti.
- Jalpy, elimizde «Ákeler kúnin» atap ótýdiń basty maqsaty – balalardyń ata-anasyna degen qurmetin arttyrý, ákeniń jáne ananyń otbasyndaǵy rólin dáripteý, otbasy qundylyqtaryn nyǵaıtý. Óıtkeni otbasy – qoǵamnyń eń mańyzdy ınstıtýttarynyń biri. Sondaı-aq bıyl «Ákeler kúni» qarsańynda, ıaǵnı, 17 maýsym kúni Astanada qalalyq «Ákeler forýmyn» ótkizýdi josparlap otyrmyz. Astana qalasy ákimdiginiń qoldaýymen ótetin forýmǵa 300 áke qatysady dep josparlanǵan. Oǵan qoǵam jáne memleket qaıratkerleri, túrli qoǵamdyq uıymdardyń belsendi ókilderi, sondaı-aq Astana qalasyndaǵy mektepter men kolledjderdiń ákeler keńesiniń tóraǵalary qatysady. Іs-shara TEDx formatynda ótip, úsh negizgi taqyrypqa arnalady. Olar – «Zań men tártip» qaǵıdaty, «Taza Qazaqstan» ekologııalyq aktsııasy jáne tsıfrlyq dáýirdegi, onyń ishinde jasandy ıntellekt jaǵdaıyndaǵy zamanaýı ákeniń róli. Forým aıasynda qatysýshylar erkin pikir almasyp, qoǵamdaǵy ózekti máseleler men bala qaýipsizdigine qatysty mańyzdy taqyryptardy talqylaıdy. Forýmnyń basty maqsaty – zamanaýı qoǵamdaǵy ákeniń rólin aıqyndap, bala qaýipsizdigi men tárbıesine qatysty ózekti máselelerdi birge talqylaý jáne ortaq sheshimder usyný, – deıdi Bekdaıyr Kúzembaı.
Aıta ketelik qazaqstandyq ata-analar balalarynyń gadjetterin qalaı baqylaıtyny týraly jazǵan edik.
