Ákeler kúni: 13 balanyń ákesi bala tárbıesi jóninde keńes berdi
NUR-SULTAN. QazAqparat – 13 balanyń ákesi Murat Qabylbaev Ákeler kúni bala tárbıesi týraly aqyl-keńes berdi, dep habarlaıdy QazAqparat.
«Barlyq ákelerdi búgingi merekemen quttyqtaımyn! Barlyq otbasyǵa baq-bereke, tatýlyq tileımin. Barlyq ákeler balalaryna kóbirek kóńil bólse eken deımin. Bala tárbıesindegi áke róli ekinshi planǵa ótip barady - kóptegen ákeler tárbıeni analarǵa júktep, materıaldyq tabys tabý mindetin ǵana moıynǵa alady», - dedi Murat Qabylbaev QazAqparat tilshisine bergen suhbatynda.
Onyń aıtýynsha, áke balanyń rýhanı damýyna da atsalysýy kerek.
«Bala ákeni tabysker retinde ǵana qabyldamaýy kerek. Áke qoldaýyn seziný balanyń tulǵa retinde damýyna septigin tıgizedi. Ákeler bala bolashaǵy úshin mańyzdy fızıkalyq tárbıe men rýhanı kúsh beredi. Rýh pen tánniń kúshti bolýynan bala ózine senimdi bolyp ósedi. Bala - ata-ananyń aınasy bolǵandyqtan, olarǵa barlyq jaǵynan úlgi bolý kerek», - dedi kópbalaly áke.
Sonymen birge, M. Qabylbaev bala asyrap alý boıynsha ózine kóptegen adamdardyń júginetinin aıtty.
«Bala asyrap alýda da analardyń erekshe belsendi bolatyny ókinishti. Bul máselede ákelerdiń de qyzyǵýshylyǵyn kórgim keledi. Meniń baıqaǵanym, asyrap alǵan balalardy tárbıeleý máseleleri boıynsha áıelder júginedi de, erler áıeliniń artynda turady. ıAǵnı, bala tárbıedegi barlyq jaýapkershilikti áıelge artyp qoıamyz. Ákeler tárbıeleý máselesine múldem aralasqysy kelmeıdi, aralaspaıdy. Bala munyń bárin sezedi», - dedi M. Qabylbaev.
Aıta keteıik, M. Qabylbaev – burynǵy ımam. Ol ata-ana qaraýynsyz qalǵan balalardy asyrap alǵan. Qazir onyń 13 balasy bar jáne 12-sin asyrap alǵan.
