Ákeler kúni: Golan jotasyndaǵy otandyq bitimgerler otbasylarynan quttyqtaý aldy
ASTANA. KAZINFORM — Ákeler kúnine oraı Golan jotasynda Birikken Ulttar Uıymynyń Baqylaý kúshteri (UNDOF) quramynda beıbitshilik saqtaý mıssııasyn atqaryp júrgen ulttyq kontıngent áskerı qyzmetshileri jaqyndarynan erekshe syı aldy.
Qorǵanys mınıstrligi baspasóz qyzmeti málim etkendeı, ulttyq kontıngent basshylyǵynyń bastamasymen bitimgerlerge otbasy múshelerinen kelgen quttyqtaý hattary tabystaldy. Shynaıy tilekter men júrekjardy qoldaý sózderi áskerı qyzmetshilerge otbasy jylýyn jáne olardyń Otanǵa aman-esen oralýyn kútip júrgen jaqyndarynyń saǵynyshyn jetkizdi.
Bul aktsııa otbasylyq qundylyqtardy nyǵaıtýǵa, urpaqtar sabaqtastyǵyn saqtaýǵa jáne ákeniń bala tárbıesi men qoǵamnyń damýyna qosatyn úlesiniń mańyzyn arttyrýǵa baǵyttaldy.
Kóptegen áskerı qyzmetshi úshin Otanǵa adal qyzmet etýdiń úlgisi óz ákeleri boldy. Bitimgerlik mıssııaǵa qatysýshylardyń biri, gvardııa 3-synypty serjanty Janat Qaıranbaev áskerı mamandyqty tańdaýyna ákesi Nurjan Jeksenbekovtyń ónegesi zor áser etkenin aıtty. Ákesi Ulttyq qaýipsizdik komıtetinde qyzmet atqaryp, 2013 jyly eńbek jolyn aıaqtaǵan.
— Bala kezimnen ákemniń óz qyzmeti men boryshyna úlken jaýapkershilikpen qaraıtynyn kórip óstim. Onyń ónegesi meni ómirimdi áskerı qyzmetpen baılanystyrýǵa sebep boldy. Merzimdi áskerı qyzmetten ótkennen keıin Shoqan Ýálıhanov atyndaǵy Kadet korpýsyna oqýǵa tústim. Keıin Qonaev qalasyndaǵy 32363 áskerı bóliminde qyzmetimdi jalǵastyrdym. Búginde men Golan jotalaryndaǵy BUU bitimgerlik mıssııasy quramynda qyzmet etip júrmin, — dedi áskerı qyzmetshi.
Qazir qazaqstandyq bitimgerlik kontıngent mıssııanyń jaýapkershilik aımaǵynda beıbitshilik pen qaýipsizdikti qamtamasyz etý jónindegi mindetterin oryndaýdy jalǵastyryp, Qazaqstan Qarýly kúshteriniń halyqaralyq arenadaǵy bedelin laıyqty dáleldep keledi.
Ákeler kúnine oraı jetken quttyqtaýlar áskerı qyzmetshiler úshin týǵan-týystarymen úzilmes baılanystyń belgisine aınalyp, júktelgen mindetterdi adal atqarýǵa qosymsha jiger berdi.
Aıta keteıik, maýsym aıynyń úshinshi jeksenbisinde elimizde ákeler kúni atap ótiledi. Mereke qarsańynda túrli mádenı-sporttyq sharalar, áleýmettik jobalar júzege asatyn dástúr bar. Óskeleń urpaqqa ákeler ınstıtýtynyń mańyzyn uǵyndyratyn jıyn qatary da kóbeıedi. Osy oraıda Kazinform agenttiginiń analıtıkalyq sholýshysy otbasydaǵy ákeniń sıpatyna úńilip, qoǵamnyń búgingi kózqarasyn taldady.
