Ákeler kúni: Elordada belsendi ákeler arasynda sport túrlerinen saıys ótti
ASTANA. KAZINFORM – Elordadaǵy №33 mektepte «Ákeler kúni» merekesine oraı elordalyq belsendi ákeler arasynda sport túrlerinen jarys ótti.
Sporttyq saıysta atalǵan Jaıly mektepte balalary bilim alatyn ákeler shaqyrylyp, baq synady. Qatysýshylar birinshi kezeńde gir tasyn kóterip saıysty. Ekinshi kezeńde asyq atýdan, úshinshi kezeńde láńgi tebýden myqtylar anyqtalsa, sońǵy qorytyndy kezeńde qol kúres saıysy ótti. Ár kezeńde qatysýshylarǵa upaı berilip otyrdy.
Іs-sharaǵa Nura aýdany «Ákeler» keńesiniń tóraǵasy Marat Tyrjanuly, Respýblıkalyq «Ákeler odaǵy» qoǵamdyq birlestigi tóraǵasynyń orynbasary ári Astana qalasy «Ákeler keńesiniń» tóraǵasy Bekdaıyr Kúzembaı arnaıy keldi.
— Osydan úsh jyl buryn Úkimet qaýlysymen elimizde eki úlken mereke toılanatyn bolyp, sheshim qabyldandy. Birinshi mereke — Analar kúni maýsym aıynyń ekinshi jeksenbisine, ekinshi mereke — Ákeler kúni maýsym aıynyń úshinshi jeksenbisine belgildendi. Sodan beri analardy da, ákelerdi osylaı quttyqtaý dástúrge aınalyp keledi. Úshinshi ret toılanyp otqan ákeler kúni merekesimen «Ákeler odaǵy» qoǵamdyq birlestiginiń atynan quttyqtaımyn, - dedi Bekdaıyr Nyǵmetuly.
Jarysty Astana qalasy Deneshynyqtyrý jáne sport basqarmasy, elordanyń Nura aýdany ákimdigi, sondaı-aq qalalyq ákimdiktiń «Sporttyq-buqaralyq is-sharalardy uıymdastyrý dırektsııasy» KMM birlese uıymdastyrdy.
Týrnır qorytyndysynda 4 saıystaǵy upaı sandary boıynsha myna qatysýshylar jeńiske jetti.
1-oryn — Saman Baýyrjan,
2-oryn — Altynbek Zeınelhan,
3-oryn — Ǵanı Bódekov.
Jarys jeńimpazy Saman Baýyrjan bul sharanyń erekshe qýanysh syılaǵanyn aıtady.
— 4 balanyń ákesimin. Buıyrtsa qyrkúıek aıynda 2 balam osy mekteptiń tabaldyryǵyn attaıdy. Ákelerdi elep-eskerip, mán berip jatqany erekshe áser etti. Bundaı jarystar áke men balanyń arasyn jaqyndastyryp, balalarǵa jaqsy úlgi kórsetý alańy bolady, - deıdi ol.
Astana qalasy «Ákeler keńesiniń» tóraǵasy Bekdaıyr Nyǵmetuly bul merekege oraı ózge de mektepterde, saıabaqtarda jáne joǵarǵy oqý oryndarynda túrli sharalar ótkizilgenin atap ótti.
— «Birtutas tárbıe» baǵdarlamasy aıasynda voleıboldan «Kúshimiz birlikte» atty qalalyq týrnır ótkizdik. Osylaı qala chempıonyn anyqtady. Osy týrnırdi elimizdiń túkpir-túkpirine chelendj retinde joldap jatyrmyz. Jyl sońynda osy týrnırdiń respýblıkalyq chempıonyn anyqtaımyz, - dedi B. Nyǵmetuly.
Onyń aıtýynsha, 8-15 maýsym aralyǵynda elordada ákeler aptalyǵy aıasynda Ulttyq kitaphanada «Ákemen birge kitap oqý» sharasy, odan bólek «Bala Tolaǵaı» sporttyq sharalary ótkizilgen. Sondaı-aq áke men balanyń arasyn jaqyndatý maqsatynda «Saıabaqta ákemen serýendeý» sekildi tárbıelik máni bar bastamalar da alǵash ret uıymdastyrylǵan. Jalpy, bir apta ishinde «Ákeler kúni» merekesine oraı 15-ke jýyq shara ótken.