Áke jolyn jalǵaǵan ormanshy: Tabıǵatty qorǵap, aıalaýymyz kerek

Áke ónegesimen qalyptasqan tańdaý

Aıbek Qosaev úshin orman sharýashylyǵy - jaı ǵana jumys orny emes. Bul - ákesi Qudaıbergen Qosaevtyń ómirin arnaǵan, otbasynyń birneshe múshesi tańdaǵan sala. Ákesi de sanaly ǵumyrynyń basym bóligin ormandy qorǵaýǵa arnap, osy baǵytta basshylyq qyzmetterge deıin kóterilgen.

Qudaıbergen Qosaevtyń orman sharýashylyǵyndaǵy eńbek joly 1979 jyly Katonqaraǵaı mehanıkalandyrylǵan orman sharýashylyǵynan bastalǵan. Keıin Bolshenarym orman sharýashylyǵyna bas ormanshy bolyp aýysyp, túrli qyzmet atqardy. Mekeme basshysy bolǵan kezeńde de ormandy qorǵaý men qalpyna keltirý isine basymdyq berdi. Ol 2020 jyly ómirden ótti.

Áke eńbegi men ustanymy balalarynyń ómir jolyna áser etpeı qoımady. Búginde Qudaıbergen Qosaevtyń uldary Erlan men Aıbek orman sharýashylyǵy salasynda eńbek etip júr. Kenje uly Álibek Batys Altaı memlekettik tabıǵı qoryǵynda ǵylymı qyzmetker bolyp jumys isteıdi.

Osylaısha, Qosaevtar otbasynyń orman sharýashylyǵyndaǵy ortaq eńbek ótili 86 jylǵa jetken. Bul - bir áýlettiń ǵana tarıhy emes, tabıǵatty qorǵaý isine birneshe urpaqtyń atsalysyp kele jatqanynyń kórinisi.

Ormanshy eńbegi - tabıǵat aldyndaǵy jaýapkershilik

Úlken Naryn orman sharýashylyǵynda on jyldan beri eńbek etip kele jatqan Aıbek Qosaev salanyń búgingi tynysyn jaqsy biledi.

Onyń aıtýynsha, keıingi jyldary ormanshylardyń jumys jaǵdaıyna kóńil bólinip, materıaldyq-tehnıkalyq baza jańaryp keledi. Jańa tehnıkalardyń alynýy mamandarǵa óz mindetterin tıimdi oryndaýǵa múmkindik beredi.

- Qazir bizdiń mamandyqqa kóbirek kóńil bólinip kele jatqanyn baıqaımyz. Jańa tehnıkalar alynyp jatyr, jalaqy da ósti. Eń bastysy, tabıǵatty, ormandy qorǵap, aıalaýymyz kerek. Bıyl órt qaýpi týyndaǵan jaǵdaılarda qurǵaq shóp tutansa, ony der kezinde aýyzdyqtap otyrdyq, - deıdi keıipkerimiz.

Ormanshynyń jumysy syrt kózge tynysh kóringenimen, onyń artynda kúndelikti baqylaý, saqtyq pen jedel áreket etý qajettiligi tur. Ásirese órt qaýpi kúsheıetin tusta orman aýmaǵyn qorǵaý mamandardan joǵary jaýapkershilikti talap etedi. Tabıǵı baılyqty saqtaý tek bir mekemeniń mindeti emes, oǵan ár azamattyń uqyptylyǵy qajet.

Aıbek Qosaevty qýantatyn jaıttyń biri - jastardyń osy salaǵa qyzyǵýshylyǵynyń artýy.

- Sońǵy kezde ormanshy bolǵysy keletin jastardyń kóbeıip kele jatqany qýantady. Bul mamandyqqa qyzyǵatyndar áli de kóp bolsa deımin. Ormanshylar eshqashan artyq bolmaıdy, - deıdi ol.

Kitapqa qushtar áke, eńbekke baýlyǵan otbasy

Qudaıbergen Qosaevtyń tabıǵatqa degen súıispenshiligi kásibı qyzmetimen ǵana shektelmegen. Ol bos ýaqytynda kitap oqýdy unatqan. Ásirese tarıhı romandardy, janýarlar men tabıǵat týraly shyǵarmalardy kóp oqyp, bilgenin balalaryna áńgimelep beretin.

Ákeniń osy ádeti otbasy músheleriniń arasyndaǵy baılanysty nyǵaıtyp qana qoımaı, balalardyń dúnıetanymynyń qalyptasýyna da yqpal etken. Onyń ómirlik ustanymy sózben emes, kúndelikti eńbegimen kórinis tapty.

Otanasy Nurgýzaıyn Kóshkenbaıqyzy ómir boıy muǵalim bolyp eńbek etken. Balalarynyń mamandyq tańdaýyna túsinistikpen qarap, olardyń áke jolyn jalǵastyrǵanyna rızashylyǵyn bildiredi. Qyzy Raýan da anasynyń jolyn qýyp, muǵalimdik mamandyqty tańdaǵan.

Qosaevtar áýletiniń eńbegi túrli baıqaýlarda da baǵalanǵan. Ótken jyly otbasy «Mereıli otbasy» ulttyq baıqaýynyń aýdandyq kezeńinde jeńimpaz atansa, bıyl «Eńbek joly» oblystyq baıqaýynda úshinshi oryn ıelendi.

Bir áýlettiń birneshe múshesin biriktirgen ortaq mamandyq olardyń ómirlik ustanymyna aınalǵan. Aıbek Qosaev úshin de áke jolyn jalǵastyrý - otbasylyq dástúrdi saqtaý ǵana emes, ózi eńbek etip júrgen óńirdiń tabıǵı baılyǵyna jaýapkershilikpen qaraý. Ormandy qorǵaýǵa baǵyttalǵan kúndelikti eńbegi arqyly ol osy mindettiń mańyzyn tereń túsinedi.

Eske salsaq, buǵan deıin ShQO-da tazy baptap, arqan tartyp, qysh qumyra jasaıtyn aýyl turǵynynan suhbat alǵanbyz.