Áke kúni úndistandyq kásipker 472 qyzynan quttyqtaý aldy
ASTANA. QazAqparat - Búkil álemde atap atap ótiletin Áke kúni Úndistannyń batysyndaǵy Gýdjarat shtatynyń Ahmedabad qalasyndaǵy ǵylymı-bilim berý, kommertsııalyq jáne mádenı ortalyǵynan kásipker Mahesh Savanı birden 472 qyzynan shyn júrekten quttyqtaýlar aldy, dep habarlady TASS.
Bul jas áıelder onyń «asyrandy qyzdary» ispetti, olar budan onshaqty jyl buryn ákesiz, panasyz qalyp, Maheshtiń qamqorlyǵyna bólengen bolatyn. Kásipker óziniń aǵasy qaıtys bolǵannan keıin onyń eki qyzyn qamqorlyǵyna alǵan edi. Sodan beri jetimderge kóz qyryn salyp júrý onyń buljymas ómirlik isine aınaldy. Osy jyldar boıy gýdjarattyq metsenat qyzdarǵa materıaldyq kómek berýmen qatar, olardyń turmysqa shyǵý toılaryn da ótkizip, otbasylyq ómirlerin de qaǵajý qaldyrǵan emes.
Jyljymaıtyn múlik, brıllıant satýda tabysqa jetken, oqý oryndary jelisin ıelengen Mahesh Savanı qarapaıym sharýa otbasynan shyqqan. Onyń ákesi Vallabbhaı Ahmedabadqa Rapard aýylynan, Arab teńizi jaǵalaýynan keldi.
Qyryq jyl buryn ol almaz óńdeýdi qolǵa aldy, sodan keıin birte-birte óziniń bıznesin uıymdastyrdy. Qazir Savanıdiń otbasy baqýatty turady, ol qyzdardyń uzatý toılaryna 400 myń rýpıı bólip otyrady. Bıylǵy jyldyń ózinde ǵana ol 216 qyzdy uzatty, osy toılarda Mahesh olardyń ákesiniń rólin atqardy.
Eske sala keteıik, asyraýshysynan aıyrylǵan úndistandyq áıelderdiń qyzyn laıyqty túrde uzatýy asa qıyn, adam ómirindegi bul mańyzdy oqıǵa eleýli shyǵyndy qajet etedi, onyń ústinde, qyzdyń jasaýyn túgeldep berýi tıis.
Taǵy bir atap óterligi, gýdjarattyq metsenat adamdardy dinı aıyrmashylyqtaryna nemese násiline qaraı bólmeıdi. Bul jóninde musylman qyzy Naheda Baný óziniń júrekjardy pikirin aıtty. Ol ákesinen erte aıyrylyp, panasyz qalǵan bolatyn, Maheshtiń kómegimen bilim aldy jáne jaqynda turmysqa shyqty. «Ol maǵan ákemnen de qymbat, árbir qyzdyń osyndaı arqa súıer senimdi tiregi bolsa, armany joq», - deıdi Naheda Baný.
