Áke, bári meniń erkimnen tys: Nuraı Serikbaıdyń ata-anasy men qurbysy sotta jaýap berdi

Kúnniń ekinshi jartysynda sotta marqumnyń ata-anasy Baýyrjan men Aıgúl Saǵynbek, sondaı-aq Nuraıdyń jaqyn qurbysy Aqsezim Shattyq jaýap berdi. Olar qyzdyń erkinen tys áketilýine qatysty mán-jaılardy, keıingi qýdalaý áreketterin jáne polıtsııaǵa júgingennen keıingi oqıǵalardy baıandady.

Qoqan-loqy men májbúrleý: ákesiniń sottaǵy jaýaby

Marqumnyń ákesi Baýyrjan Saǵynbek qyzyn sabyrly, tárbıeli ári maqsatyna berik jan retinde sıpattady. Onyń aıtýynsha, Nuraı mektepti úzdik bitirip, árdaıym bilim alýǵa jáne kásibı turǵydan ósýge umtylǵan. Ol sánger bolýdy armandap, Italııada jumys isteýdi kózdegen.

Sotta Baýyrjan Saǵynbek aıyptalýshy Sherhan Aımahannyń Nuraıdyń óz erkimen birge ketkeni týraly málimdemesin úzildi-kesildi joqqa shyǵardy. Onyń aıtýynsha, aıyptalýshy qyzdy kúshtep kólikke otyrǵyzyp, telefonyn ıemdenip, Almatydan alyp ketken.

— Saǵat shamamen 13:00–de qyzymyzben múlde baılanysa almadyq. Keıin Nuraı aıyptalýshynyń telefonyn tartyp alyp, únemi balaǵattap, qorqytqanyn aıtty. Ol: «Eger rólge jarmassań, ekeýmiz de ólemiz, kólik aýdarylady», — dep qoqan-loqy kórsetken. Biz aqyry sóıleskende qyzymyz bir-aq nárse aıtty: «Áke, munda bolyp jatqannyń bári meniń erkimnen tys. Meni bul jerden alyp ketińizder». Osy sózderden keıin onyń óz erkimen eshqaıda ketpegenine esh kúmánim qalmady, — dedi Baýyrjan Saǵynbek.

Ákesiniń aıtýynsha, uldary qaryndastaryn alyp kelýge ketken kezde aıyptalýshynyń týystary shaqyrýsyz olardyń úıine kelgen. Olar bolǵan jaǵdaıdy quda túsý retinde kórsetýge tyrysyp, otbasyǵa belgisiz bir qolhat kórsetken. Áńgime sońy janjalǵa ulasyp, polıtsııa shaqyrýǵa týra kelgen.

Baýyrjan Saǵynbek qyzynyń Aımahanmen erikti túrde qarym-qatynasta bolǵany týraly málimdemelerdi de joqqa shyǵardy. Onyń aıtýynsha, úıine oralǵan soń Nuraı onymen barlyq baılanysty úzýge tyrysqan. Soǵan qaramastan Aımahan kezdesýge umtylyp, tanystary arqyly habarlasyp, qyzdyń kelisiminsiz aqsha aýdaryp, ony qýdalaýyn toqtatpaǵan.

Aıyptalýshy jibergen barlyq aqshany otbasy aldymen onyń ákesine qaıtarmaq bolǵan. Alaıda ol aqshany alýdan bas tartqan soń qarajat balalarǵa arnalǵan qaıyrymdylyq qoryna aýdarylyp, sotqa bank túbirtekteriniń kóshirmeleri usynylǵan.

Jábirlenýshi taraptyń aıtýynsha, otbasy birneshe ret polıtsııa men prokýratýraǵa júgingenimen, tıisti sharalar qabyldanbaǵan.

— Eger quqyq qorǵaý organdary bizdiń aryzdarymyzǵa der kezinde áreket etkende, bul qaıǵyly jaǵdaı bolmas edi, — dedi Baýyrjan Saǵynbek.

Polıtsııadaǵy qysym: Nuraıdyń anasy ne aıtty

Jaýap berý aldynda Nuraıdyń anasy Aıgúl Saǵynbek kóz jasyna erik berip, uzaq jylady. Keıin sabyrǵa kelip, qyzy úıine qaıtarylǵannan soń polıtsııa bóliminde bolǵan jaǵdaılardy baıandady.

Onyń aıtýynsha, Nuraıǵa aryzyn qaıtaryp alýy úshin psıhologııalyq qysym jasalǵan.

— Bizdi qyzymyzǵa uzaq ýaqyt jolatpady. Keıin Nuraı polıtseıler men tergeýshiniń: «Bul jigittiń 20 jylǵa sottalǵanyn qalaısyń ba? Osyndaı kúnáni moınyńa alýǵa daıynsyń ba? Keıin qalaı ómir súresiń?» — dep aıtqanyn jetkizdi. Oǵan aıyptalýshy endi jolamaıdy dep ýáde berip, basqa mazmundaǵy aryz jazýǵa jáne «óz erkimmen kettim» degen beınejazba túsirýge májbúrlegen, — dedi Aıgúl Saǵynbek.

Ata-anasynyń aıtýynsha, kelesi kúni olar prokýratýraǵa qyzdy erkinen tys áketý jáne polıtsııa qyzmetkerleriniń qysym kórsetýi týraly aryz berýge barǵan. Biraq Nuraıdyń óz erkimen ketkeni týraly beınejazbaǵa súıenip, aryz qabyldanbaǵan.

Sonymen qatar marqumnyń anasy sotta aıyptalýshy Sherhan Aımahannyń buǵan deıin avtokólik urlaý isinde de aty atalǵanyn málimdedi.

Qaýiptenip, páter aýystyrýdy josparlaǵanbyz: jaqyn qurbysynyń jaýaby

Sotta kýá retinde Nuraıdyń bala kúngi jaqyn qurbysy ári Almatyda páterde birge turǵan syrlasy Aqsezim Shattyq jaýap berdi. Ol alyp qashý oqıǵasynan keıin aıyptalýshynyń Nuraıdy dostary, kýrstastary jáne týystary arqyly izdeýdi jalǵastyrǵanyn aıtty.

Aqsezimniń sózinshe, Nuraı eshqashan Aımahanǵa turmysqa shyǵýdy josparlamaǵan. 2025 jylǵy qazan aıyndaǵy alyp qashý oqıǵasynan keıin ol odan qatty qorqyp, barlyq baılanysty úzýge tyrysqan.

— Sherhan ony alyp qashqan kezde janarmaı quıý beketinde Nuraıdy kúshtep kólikke otyrǵyzyp, telefonyn tartyp aldy. Keıin Nuraı maǵan Aımahannyń ózin aldaǵanyn aıtty. «Meni alyp bara jatqanda ol shynaıy beınesin kórsetip, múlde basqa adamǵa aınaldy, maǵan psıhologııalyq qysym kórsete bastady», — degen edi. Osydan keıin Nuraı odan qatty qorqatyn boldy. Ol eki-úsh ret telefon nómirin aýystyrdy, Sherhan barlyq qurbylaryna jazyp, jańa nómirin suraǵandyqtan bizdi Instagram jelisindegi jazylýshylar qatarynan da alyp tastady. Sherhan ýnıversıtetke kelip, úıdiń mańynda júrdi, ártúrli nómirlerden qońyraý shaldy. Biz tipti páter aýystyrýdy josparlaǵanbyz, biraq úlgermedik, Nuraıdy óltirip ketti, — dedi Aqsezim Shattyq.

Sondaı-aq kýáger aıyptalýshynyń Nuraıǵa úılenýge usynys jasaǵany jáne saqına syılaǵany týraly aıtqan sózderin joqqa shyǵardy.

Kýálar jaýap bergennen keıin jábirlenýshi taraptyń advokaty Nuraı Serikbaıdyń erkinen tys áketilýine qatysty aryz boıynsha protsessýaldyq sheshim qabyldaǵan tergeýshi men prokýrordy sotqa shaqyrý týraly ótinishhat berdi. Sot bul ótinishti keıinirek qaraıdy.

Kelesi sot otyrysy 31 shildege belgilendi.

Eske sala keteıik, 28 shildede Shymkent qalasynyń mamandandyrylǵan aýdanaralyq qylmystyq ister jónindegi sotynda 21 jastaǵy Nuraı Serikbaıdyń ólimine qatysty basty sot talqylaýy bastaldy. Sotta aıyptalýshy Sherhan Aımahan jaýap berip, kinásin moıyndamaı, áreketin affekt jaǵdaıynda jasaǵanyn málimdedi. 

Tergeý nusqasyna sáıkes, 11 qańtar kúni Shymkentte Nuraı Serikbaı qaza tapqan. Aıyptaý tarapynyń málimetinshe, aıyptalýshy qyzǵa 35 ret pyshaq jaraqatyn salǵan. Sherhan Aımahanǵa nekege májbúrleý, stalkıng jáne asa qatygezdikpen adam óltirý baptary boıynsha aıyp taǵylǵan. Eger kinási dáleldense, oǵan ómir boıyna bas bostandyǵynan aıyrý jazasy taǵaıyndalýy múmkin.