Aktsızdik postylardyń qyzmetin uıymdastyrý týraly Erejeler bekitildi - Úkimet qaýlysy

Aktsızdik postylardyń qyzmetin uıymdastyrý Erejelerin bekitý týraly

Qazaqstan Respýblıkasy Úkimetiniń qaýlysy 

2012 jylǵy 16 qańtar №61 Astana, Úkimet Úıi

 «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń 2008 jylǵy 10 jeltoqsandaǵy Kodeksiniń (Salyq kodeksi) 653-babynyń 6-tarmaǵynyń 5) tarmaqshasyna sáıkes Qazaqstan Respýblıkasynyń Úkimeti qaýly etedi:

1. Qosa berilip otyrǵan Aktsızdik postylardyń qyzmetin uıymdastyrý qaǵıdalary bekitilsin.

2. Osy qaýly 2012 jylǵy 1 qańtardan bastap qoldanysqa engiziledi jáne resmı jarııalanýǵa tıis.

                                                                        Qazaqstan Respýblıkasynyń Premer-Mınıstri K.MÁSІMOV.


 Qazaqstan Respýblıkasy Úkimetiniń 2012 jylǵy 16 qańtardaǵy №61 qaýlysymen bekitilgen

 Aktsızdik postylardyń qyzmetin uıymdastyrý Erejeleri

1. Jalpy erejeler

 1. Osy Aktsızdik postylardyń qyzmetin uıymdastyrý qaǵıdalary (budan ári - Qaǵıdalar) «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń 2008 jylǵy 10 jeltoqsandaǵy Kodeksiniń (Salyq kodeksi) 653-baby 6-tarmaǵynyń 5) tarmaqshasyna sáıkes ázirlengen jáne aktsızdik postylardyń qyzmetin uıymdastyrý tártibin aıqyndaıdy.

2. Aktsızdik postylar lıtsenzııada kórsetilgen mekenjaı boıynsha salyq tóleýshilerdiń aýmaǵynda tikeleı:

1) etıl spırtin;

2) alkogol ónimin;

3) temeki buıymdaryn;

4) benzın (avıatsııalyq benzındi qospaǵanda), dızel otynyn óndirýdi júzege asyrý oryndarynda ornatylady.

3. Sondaı-aq aktsızdik postylar salyq tóleýshilerdiń aýmaǵynda:

1) munaı men munaı ónimderin magıstraldyq munaı ónimderi qubyrlary arqyly ornyn aýystyrý;

2) munaı men munaı ónimderin temir jol kóligimen ornyn aýystyrý;

3) alkogol ónimin, temeki buıymdaryn, benzın (avıatsııalyq benzındi qospaǵanda), dızel otynyn kóterme saýdada ótkizýi júzege asyrǵanda ornatylady.

4. Osy Qaǵıdalardyń 3-tarmaǵynda kórsetilgen aktsızdik postylar (munaı men munaı ónimderin magıstraldyq munaı ónimderi qubyrlary arqyly ótkizýdi júzege asyratyn salyq tóleýshiniń aýmaǵynda ornatylatyn aktsızdik postylardy qospaǵanda), osy Qaǵıdalardyń 9-tarmaǵyna sáıkes tabys etiletin habarlamada kórsetilgen, aktsızdeletin taýarlardy alǵan kúnnen bastap ımporttalaǵan aktsızdeletin taýarlardy esepke alǵan kúnge deıingi merzimge belgilenedi.

2. Aktsızdik postylardyń qyzmetin uıymdastyrý tártibi

5. Aktsızdik postylardyń qyzmetin jedel basqarýdy jáne úılestirýdi qyzmettiń jekelegen túrleri boıynsha salyq tóleýshini tirkeý orny boıynsha oblystar, Astana jáne Almaty qalalary boıynsha salyq organdarynyń basshylary júzege asyrady.

6. Aktsızdik postylardy uıymdastyrý, ornalasqan oryndary men qyzmetkerlerdiń quramy, salyq tóleýshilerdiń jumys rejımine sáıkes olardyń jumys reglamenti qyzmettiń jekelegen túrleri boıynsha salyq tóleýshini tirkeý orny boıynsha salyq organy basshysynyń buıryǵymen aıqyndalady.

7. Aktsızdik postynyń quramy qyzmettiń jekelegen túrleri boıynsha salyq tóleýshini tirkeý orny boıynsha salyq organynyń laýazymdy adamdarynyń qatarynan quralady (budan ári - laýazymdy adamdar).

Laýazymdy adamdar osy Qaǵıdalarda kórsetilgen áreketterdi júzege asyrǵan kezde Salyq kodeksiniń aktsızdeletin taýarlardyń jekelegen túrleriniń óndirisi men aınalymyn memlekettik retteý máseleleri jónindegi zańnamanyń normalaryn, osy Qaǵıdalardy basshylyqqa alady.

8. Aktsızdik postynyń jumys kestesi osy Qaǵıdalardyń 2 jáne 3-tarmaqtarynda kórsetilgen salyq tóleýshilerdiń jumys isteý rejımine sáıkes aıqyndalady.

9. Salyq kodeksiniń 14-babynyń 1-tarmaǵynyń 7) tarmaqshasyna sáıkes Qazaqstan Respýblıkasynyń aýmaǵyna Keden odaǵyna múshe memleketterden aktsızdelenetin taýarlardy (jeńil avtomobılderdi jáne magıstraldyq qubyrlarmen ótkiziletin aktsızdeletin taýarlardy qospaǵanda) ótkizýdi júzege asyratyn salyq tóleýshiler kórsetilgen taýarlardyń ákelinetin orny boıynsha salyq organdaryn úsh jumys kúninen keshiktirmeı olardyń aldaǵy alý kúni týraly osy Qaǵıdalarǵa 1-qosymshaǵa sáıkes nysan boıynsha habarlandyrady.

10. Osy Qaǵıdalardyń 9-tarmaǵynda kórsetilgen habarlamany alý orny boıynsha salyq organdary olardyń esebin osy Qaǵıdalarǵa 2-qosymshaǵa sáıkes nysan boıynsha jýrnalda júrgizedi.

11. Laýazymdy adam aktsızdik postyda bolǵan kezeńinde:

1) negizgi shıkizatty, qosalqy materıaldardy, aktsızdeletin taýarlardyń jekelegen túrlerin tıep-jóneltken, júkti túsirgen (qabyldaǵan), ornyn aýystyrǵan kezde qatysýǵa jáne olardyń kólemin taýarlardyń ilespe júkqujattarynda kórsetilgen jáne esepke qabyldap alǵan derektermen salystyryp tekserýge;

2) alkogol ónimine arnalǵan esepke alý-baqylaý tańbalardyń túpnusqalyǵyn iriktep tekserýdi arnaıy aspaptar arqyly júzege asyrýǵa;

3) aǵymdaǵy jumys kúni ishinde ákelinetin aktsızdeletin ónimdi qabyldaýdy (túsirýdi) aıaqtaı almaǵan jaǵdaıda, kásiporynnyń jaýapty qyzmetkerimen birlesip, qoıma úı-jaılaryn, kólik quraldaryn jumys istemeıtin ýaqyt kezeńine mórlep jáne (nemese) plombalaýǵa jáne aktsızdeletin taýarlardyń qolda baryn jáne olardyń bútindigin tekserýge;

4) jumys istemeıtin ýaqyt kezeńine jáne turyp qalǵan ýaqytta:

aktsızdelenetin taýarlardyń jekelegen túrlerin paıdalaný men jumys isteýin boldyrmaý úshin óndirý jelilerin;

spırt saqtalatyn qoımadan alkogol ónimin óndirýge etıl spırtin berý krandaryn;

munaı ónimderiniń jekelegen túrlerin óndirýge arnalǵan shıki munaıdy, munaı ónimderin jiberý krandaryn (burandalaryn);

óndirýshiniń nemese kóterme satýshynyń kirý jáne shyǵý qaqpalaryn (óndirýshimen nemese kóterme saýdada satýshymen kelisim boıynsha);

alkogol ónimderin óndirýshiniń aralastyrý tsehyndaǵy kirgizý jáne shyǵarý qubyr jelilerin;

munaı ónimderin aralastyrýdy júzege asyratyn kásiporyndar men shaǵyn munaı óńdirýshi zaýyttardaǵy kirgizý jáne shyǵarý qubyr jelileriniń krandaryn (burandalaryn);

aktsızdeletin taýarlardyń jekelegen túrlerin saqtaýǵa arnalǵan qoıma úı-jaılaryn;

dızel otynyn, benzındi bosatý krandaryn mórleýge jáne (nemese) plomba salýǵa.

Mórleý jáne (nemese) plomby salý jónindegi jumystardy júzege asyrǵannan keıin osy Qaǵıdalarǵa 3-qosymshaǵa sáıkes nysan boıynsha mórleý jáne (nemese) plomby salý aktisi jasalady.

Tabıǵı jáne tehnogendik sıpattaǵy tótenshe jaǵdaılar týyndaǵan jaǵdaıda kórsetilgen mórler men plombalardy óndirýshiniń nemese kóterme saýdada satýshynyń ókilderi alady.

Tabıǵı jáne tehnogendik sıpattaǵy tótenshe jaǵdaı faktisin tabıǵı jáne tehnogendik sıpattaǵy tótenshe jaǵdaı salasyndaǵy ýákiletti organ rastaıdy;

5) óndirýshiden nemese kóterme satýshynyń basshysynan jáne basqa da laýazymdy adamdardan aktsızdeletin taýarlardyń jekelegen túrlerin óndirý men aınalymy jónindegi málimetter men qujattardy óz ókilettikteri sheginde suratýǵa;

6) sharýashylyq qyzmetke aralasý quqyǵynsyz, qajet bolǵan jaǵdaıda qaýipsizdik tehnıkasy jónindegi nusqaýlyqtan ótýmen, salyq tóleýshiniń ákimshilik, óndiristik, qoıma, saýda, qosalqy úı-jaılaryn zertteýge;

7) óndirýshiniń nemese kóterme satýshynyń aýmaǵynan (aýmaǵyna) shyqqan (kirgen) kólik quraldaryn tekserip qaraýǵa;

8) aktsızdeletin taýarlardyń jekelegen túrleriniń, sondaı-aq osy Qaǵıdalarda kórsetilgen negizgi shıkizat pen qosalqy materıaldardyń qaldyqtaryn shyǵarýdy júzege asyrýǵa, qaldyqtardy shyǵarý aktisin osy Qaǵıdalardyń 4-qosymshasyna sáıkes nysan boıynsha jasaýǵa;

9) salyq tóleýshilerden qyzmettiń jekelegen túrleri boıynsha qyzmettiń tıisti túrlerine tirkeý kartochkasynyń bar-joǵyn suratýǵa;

10) kólemi kólemdi-salmaqty ádispen aıqyndalatyn munaı, benzın (avıatsııalyqty qospaǵanda), dızel otynyn burýdy jáne (nemese) jiberýdi baqylaýǵa quqyǵy bar.

12. Aktsızdik postydaǵy laýazymdy adam:

1) salyq tóleýshilerdiń aktsızdelenetin taýarlardy óndirý men ótkizýdi retteıtin Qazaqstan Respýblıkasy zańnamasynyń talaptaryn saqtaýyna;

2) satyp alýshyda lıtsenzııanyń jáne (nemese) lıtsenzııaǵa qosymsha bolýyna;

3) ımporttalatyn aktsızdeletin taýarlardy esepke qabyldaýyna;

4) aktsızdeletin taýarlardy tek ólsheýshi apparattary arqyly burýyna jáne (nemese) jiberilýine nemese esepke alý aspaptary arqyly satýymen (quıýmen), sondaı aq sońǵylardyń plomba salynǵan túrde paıdalanylýyna;

5) salyq tóleýshiniń aktsızdeletin taýarlardyń jekelegen túrlerin esepke alý-baqylaý nemese aktsızdik tańbalarmen tańbalaý tártibin saqtaýyna;

6) salyq tóleýshiniń jiberilgen kezinde aktsızdeletin taýarlardyń jekelegen túrlerine ilespe júkqujattaryn rásimdeý tártibin saqtaýyna;

7) aktsızdeletin taýarlarǵa aktsız stavkalarynyń durys qoldanylýyna jáne aktsızdiń bıýdjetke ýaqtyly jáne tolyq tólenýine;

8) aktsızdeletin taýarlardyń óndirisi úshin negizgi shıkizattyń, qosalqy materıaldardyń, daıyn ónimniń, esepke alý-baqylaý tańbalarynyń nemese aktsızdik tańbalardyń qozǵalysyna baqylaýdy júzege asyrady.

13. Aktsızdik postydaǵy laýazymdy adam:

1) negizgi shıkizatty qabyldaýǵa qatysady;

2) aktsızdeletin taýarlardyń jekelegen túrlerin óndirý kezinde paıdalanylatyn qural-jabdyqty alyp tastaý, almastyrý nemese jańasyn engizý jaǵdaıy bolǵanda, bir jumys kúninen keshiktirmeı jazbasha túrde salyq organy men Salyq komıtetine habarlaıdy;

3) alkogol ónimin óndirýshiniń jaýapty tulǵasymen birlesip (kómirtek qostotyǵymen qanyqqanynan jáne sharap materıalynan basqa) alkogol ónimin quıý jelilerin jýýdy bastaý men aıaqtaýdy esepke alý aspaptarynyń kórsetkishterin osy Qaǵıdalarǵa 5-qosymshaǵa sáıkes nysan boıynsha jýrnalda belgileıdi;

4) munaı ónimderiniń jekelegen túrleriniń esepke alý aspaptarynyń (bolǵan jaǵdaıda) kórsetkishterin osy Qaǵıdalarǵa 6-qosymshaǵa sáıkes nysan boıynsha jýrnalda belgileıdi;

5) óndirýshiniń aýmaǵynda ornatylǵan aktsızdik postydaǵy kezekshilikten keıingi ekinshi kúni «Aktsız» aqparattyq júıesi arqyly osy Qaǵıdalarǵa 7, 8-qosymshalarǵa sáıkes nysan boıynsha benzın jáne dızel otynyn, etıl spırti, alkogol ónimin (sharap materıalynan basqa) óndirý men ótkizý kólemderi týraly kún saıynǵy esepterdi Salyq komıtetine berýdi qamtamasyz etedi;

6) jekelegen qyzmet túrleri boıynsha salyq tóleýshiniń tirkeý orny boıynsha salyq organyna osy Qaǵıdalardyń 15-tarmaǵynda kórsetilgen esepti aı saıyn toltyrý úshin shetten ákelingen alkogol ónimi, temeki buıymdary, benzın (avıatsııalyq benzındi qospaǵanda), dızel otyny jónindegi málimetterdi jiberedi;

7) mórdiń nemese plombanyń buzylǵanyn nemese burmalanǵanyn (tótenshe jaǵdaılar týyndaýyn qospaǵanda) ne spırt ólsheýshi apparattardyń baqylaýshy esepke alý aspaptary kórsetkishteriniń burmalanǵanyn anyqtaǵan nemese belgilenbegen úlgidegi jáne (nemese) sáıkestendirýge jatpaıtyn esepke alý-baqylaý nemese aktsızdik markalardy, alkogol ónimindegi esepke alý-baqylaý markasynyń, temeki buıymdarynda aktsızdik markalardyń joq ekendigin anyqtaǵan jaǵdaıda tıisti akt jasaıdy.

Kórsetilgen faktiler olar anyqtalǵan sátinen bastap bir jumys kúninen keshiktirilmeı joǵaryda turǵan salyq organyna jazbasha túrde jetkiziledi.

14. Munaı men munaı ónimderin magıstraldyq munaı ónimderi qubyrlary, temir jol kóligi arqyly ornyn aýystyrýdy júzege asyratyn salyq tóleýshide ornatylǵan aktsızdik postyda otyrǵan laýazymdy adam:

1) munaı jáne munaı ónimderin esepke alý aspaptarynyń (bar bolǵan jaǵdaıda) kórsetkishterin jumys kúniniń basynda jáne aıaǵynda osy Qaǵıdalarǵa 9-qosymshaǵa sáıkes nysan boıynsha jýrnalda belgileıdi;

2) kólemi kólemdi-salmaqtyq ádispen aıqyndalatyn munaı, benzın (avıatsııalyq benzındi qospaǵanda), dızel otynyn qabyldaýǵa jáne tıep jóneltýge qatysady;

3) Qazaqstan Respýblıkasynyń aýmaǵyna Keden odaǵyna múshe memleketterden munaı men munaı ónimderin magıstraldyq munaı ónimderi qubyrlary, temir jol kóligi arqyly ornyn aýystyrǵan munaı jáne munaı ónimderi jónindegi málimetterdi qyzmettiń jekelegen túrleri boıynsha salyq tóleýshiniń tirkeý orny boıynsha salyq organyna osy Qaǵıdalardyń 15-tarmaǵynda kórsetilgen aı saıyn esepti toltyrý úshin jiberedi.

15. Salyq tóleýshiniń tirkeý orny boıynsha salyq organy Qazaqstan Respýblıkasynyń aýmaǵyna Keden odaǵyna múshe memleketterden ótkizilgen munaı men munaı ónimderin, Keden odaǵyna múshe memleketterden ákelingen alkogol ónimi, temeki buıymdary, benzın (avıatsııalyq benzındi qospaǵanda), dızel otyny jónindegi esepterdi aqparattyq júıe arqyly esepti aıdan keıingi aıdyń 10 kúninen keshiktirmeı Salyq komıtetine osy Qaǵıdalarǵa 10-qosymshaǵa sáıkes nysan boıynsha berýdi qamtamasyz etedi.

16. Etıl spırtin, alkogol ónimin, temeki buıymdaryn, benzın (avıatsııalyq benzındi qospaǵanda), dızel otynyn óndirýshiniń aýmaǵynda ornatylǵan aktsızdik postyda otyrǵan laýazymdy adam osy Qaǵıdalardyń 11, 12 jáne 13-qosymshalaryna sáıkes nysandar boıynsha jýrnaldardy kún saıyn júrgizedi.

Bul rette aralastyrý kezinde shıkizat retinde paıdalanylatyn munaı ónimderiniń kólemderi negizgi shıkizattyń qozǵalysy jýrnalynda kórsetiledi.

Jýrnaldar nómirlenedi, baýlanady, basshynyń qoly qoıylady jáne tıisti salyq organynyń móri basylady.

3. Qorytyndy erejeler

 17. Aktsızdik postylardyń qyzmetin baqylaý Salyq komıtetine salyq organdary bergen derekterdi taldaý jáne salyq organdary men Salyq komıtetiniń aktsızdik postylarǵa tekserý júrgizýi arqyly júzege asyrylady.

Aktsızdik postylardyń qyzmetin uıymdastyrý qaǵıdalaryna qosymshalar resmı BAQ-tarda jarııalandy.