Aktsızdi kúrt kóterý alkogol ónimderiniń «kóleńkeli» tusyn arttyrýy múmkin - Úkimet basshysy
ASTANA. 23 qazan. QazAqparat - Aktsızdi kúrt kóterý alkogol ónimderiniń «kóleńkeli» tusyn arttyrýy múmkin. Búgin Parlament Májilisiniń jalpy otyrysynda «2014-2016 jyldarǵa arnalǵan respýblıkalyq bıýdjet týraly» zań jobasyn talqylaý barysynda depýtattar saýalyna jaýap bergen QR Premer-Mınıstri Serik Ahmetov osylaı málim etti.
Bıýdjet jobasyn talqylaý barysynda depýtat Gúlmıra Isimbaeva áleýmettik zııandy taýarlarǵa aktsızderdi kóterý týraly Elbasy bastamasyna toqtala kele, onyń ishinde temeki men alkogolge aktsızdi arttyra túsý máselesine erekshe mán bergen bolatyn. Depýtattyń aıtýynsha, eger temeki aktsızine qatysty byltyrdan beri birqatar sharalar qabyldanyp jatsa, alkogol aktsızinde jaǵdaıymyz máz bolmaı tur. «Elimizde alkogol ónimine aktsız mólsheri Keden odaǵynyń basqa elderine qaraǵanda 300-400 paıyzǵa tómen. Al bıýdjet jobasynda usynylyp otyrǵan aktsızdi kezeń-kezeńimen arttyrý osy aıyrmashylyqty tómendetpeıdi dese de bolady», - dedi G. Isimbaeva. Bul rette depýtat Úkimet basshysynan Elbasynyń alkogol ishimdikterine aktsızdi kóterý týraly tapsyrmasy qalaı sheshimin taýyp jatqanyn suraǵan bolatyn.
Óz kezeginde Premer-Mınıstr Serik Ahmetov temeki men alkogol ónimderine aktsızdi arttyrý máselesi asa qajetti qadam ekenin, Úkimet buny durys baǵyt dep sanaıtynyn jetkizdi. «Onyń ústine Kedendik odaq sheńberinde biz Reseı men Belarýs elderinen birshama qalyp kele jatqanymyz da bar. Alaıda, toqtala ketetin jaıt, kúshti alkogol ónimderine aktsızdi kóterýge teńgerimdi jáne satyly kezeńmen kelýimiz kerek. Aktsızderdi kúrt kóterý alkogol ónimderiniń «kóleńkeli» tusyn arttyrýy múmkin. Sondyqtan da, biz bul máseleni jetkilikti túrde qaradyq. Elbasy da naýryz aıynda Úkimettiń alkogol ishimdikterine aktsızdi kezeń-kezeńimen kóterý týraly ustanymyn qoldady», - dedi S. Ahmetov.
Budan bólek, Premer-Mınıstr 2014 jyly aǵymdaǵy jylmen salystyrǵanda temeki men alkogol ónimine aktsızder eki esege artatynyn, al 2016 jyly úsh esege deıin kóteriletinin atap ótti. «2020 jylǵa qaraı biz Keden odaǵyndaǵy negizgi áriptesterimizben alkogol ónimderindegi aktsızder boıynsha teńese alamyz dep oılaımyn», - dedi S. Ahmetov.
