Aktsııalardyń baǵasyn Úkimet belgileıtin bolady - «QazTransOıl» kompanııasynyń bas dırektory Q.Qabyldın
ASTANA. 15 tamyz. QazAqparat - Kompanııa aktsııalarynyń baǵasyn el Úkimeti belgileıtin bolady. Búgin Astanada ótken baspasóz máslıhatynda «Halyqtyq IPO» qatysatyn alǵashqy kompanııa - «QazTransOıldyń» bas dırektory Qaıyrgeldi Qabyldın osylaı aıtty.
Onyń habarlaýynsha, qazirgi kezde kompanııa basshylyǵy aktsııalardyń sanyn kóbeıtý boıynsha tıisti sheshim qabyldap, ony quziretti organdarda bekitip aldy. «Osy aktsııalardyń baǵasy men naryqtaǵy kólemin el Úkimeti bekitip, arnaıy qaýly shyǵaratyn bolady», - deıdi Q.Qabyldın.
Aıta keteıik, resmı málimetke sáıkes, «QazTransOıl» kompanııasynyń aktsııalaryna qatysty Úkimet qaýlysy qyrkúıek aıynda qabyldanýy tıis. Kelesi aıda aryz-ótinishterdi qabyldaý naýqany bastalady.
