Aktsııa jeńimpazyna avtomobıl kilti tapsyryldy
ASTANA. QazAqparat - Búgin QR QM Memlekettik kirister komıtetinde vedomstvo tóraǵasy Ardaq Teńgebaev «Chekti talap et syılyqty utyp al!» aktsııasynyń jeńimpazy Ravıl Haırýlınge avtomobıldiń kiltin tapsyrdy.
Bul týraly atalǵan vedomstvodan málim etti, dep habarlaıdy QazAqparat.
Esterińizge salsaq, aǵymdaǵy jylǵy 23 jeltoqsanda Memlekettik kirister komıtetinde «Chekti talap et syılyqty utyp al!» aktsııasy boıynsha aqtyq syn ótti. Onda Petropavl qalasynyń turǵyny Ravıl Haırýlınniń 2016 jylǵy 22 qazanda jibergen chegi jeńimpaz dep tanyldy.
Búgin ol jubaıymen Petropavl qalasynan «Atameken» UKP bıznes qaýymdastyǵy atynan usynylǵan utysy Chevrolet markaly avtokólikti alyp ketýge keldi.
Haırýlın 596 teńge kólemindegi chek oǵan shyn máninde baqytty bolǵany jáne aktsııaǵa qatysýy men jeńiske jetýi jaıly málimettermen bólisti. Onyń aıtýynsha, bul aktsııa bastalǵannan beri qatysyp keledi. Eń birinshi túbirtekti 2016 jyldyń 4 qazanynda jibergen. Aktsııa aıaqtalǵan ýaqytqa deıin 89 túbirtek joldaǵan.
«Chekti talap et syılyqty utyp al!» aktsııasyn MKK men «Atameken» UKP birlesip aǵymdaǵy jylǵy 1 qazan men 15 jeltoqsan aralyǵynda ótkizgen bolatyn. 27 myńdaı qazaqstandyq aktsııaǵa qatysyp, «Wipon» mobıldi qosymshasy arqyly memlekettik kirister organdaryna 1,5 mln. asa fıskaldy chek jibergen.
Aıta keterligi, aktsııa ótken eki jarym aı ishinde respýblıka boıynsha 120-dan asa qundy júlde utysqa salyndy, onyń ishinde turmystyq jáne orgtehnıka, baılanys quraldary men ydys-aıaq bar. Chekterdiń eń kóp sanyn Ońtústik Qazaqstan, Shyǵys Qazaqstan oblystary men Almaty qalasynyń turǵyndary jibergen. Atalǵan aktsııa osymen ekinshi jyl ótkizilip otyr. Ol kelesi jyly da óz jalǵasyn tabady.
