Aktsıonerlik qoǵamdardyń kópshiligi korporatıvtik basqarý júıesin damytýǵa yqylassyz-QQA ókili
ALMATY. 26 qarasha. QazAqparat /Erlik Erjanuly/ - Qazirgi tańda aktsıonerlik qoǵamdardyń qyzmetin quqyqtyq qamtamasyz etý máseleleri zańdyq dárejede jetkilikti túrde rettelgen.
QR Qarjy naryǵy men qarjy uıymdaryn retteý jáne qadaǵalaý agenttiginiń Baǵaly qaǵazdar men zeınetaqy jınaqtaý qorlary naryǵy sýbektilerin qadaǵalaý deparatamentiniń qashyqtyqtan baqylaý basqarmasynyń bastyǵy Qýanyshbek Ábjanov ony búgin Almatyda ótip jatqan Korporatıvtik basqarý jónindegi ІІІ ortalyqazııalyq sammıtte aıtty.
"Qazirgi kezde aktsıonerlik qoǵamdardyń kópshiligi korporatıvtik basqarý júıesin damytýǵa yqylassyz. Onyń negizgi sebepteriniń biri- qor naryǵyna shyqpaı-aq qoǵam qyzmetine qatysty aqparatty aıtarlyqtaı kólemde ashpaı kredıt quraldaryn tartý múmkindiginiń bolýy", deıdi Qýanyshbek Ábjanov.
Onyń aıtýynsha, qazirgi jaǵdaıda zań men memlekettik organdardyń normatıvtik quqyqtyq aktileri ózimen birge Korporatıvtik basqarý kodeksi men kompanııanyń ózge ishki standarttaryn aýystyrýda. «Aktsıonerlik qoǵamdar týraly» QR Zańynda aktsıonerlik qoǵamdardy qurý, basqarý jáne onyń qyzmetin toqtatýdy, aktsıonerler quqyn qorǵaýǵa baǵyttalǵan protsedýralar men qoǵam organdarynyń ókilettiginiń tártibi men normalary bar. Onyń ishinde aktsıonerlik qoǵam qyzmeti týraly aktsıonerlerdiń habardar bolýy men onda sheshimder qabyldaý jáne aktıvtermen kelisimder jasaý tártibi bar.
«Korporatıvtik basqarýǵa jasalǵan taldaý Qazaqstan zańdarynyń jaǵdaıy ozyq halyqaralyq tájirıbeler jınaqtalǵan Ekonomıkalyq yntymaqtastyq jáne damý uıymynyń (EYDU) korporatıvtik basqarý qaǵıdattaryna sáıkes keledi. EYDU-dyń aktsıonerler quqy men menshik ıeleriniń negizgi fýktsııalary, aktsıonerler úshin talaptardyń teńdigi, aqparatty ashý men ashyqtyqqa qatysty negizgi qaǵıdattary jáne Dırektorlar keńesi mindetteri tolyq saqtalyp otyr. Sonymen qatar korporatıvtik basqarýdyń tıimdi júıesiniń negizin jasaý men korporatıvtik basqarýdaǵy múddeli taraptardyń róli qaǵıdattary da tolyq kólemde saqtalýda», - dedi Q. Ábjanov.
