Aqboz atty qazaqtyń erligi támam jurtty tań qaldyrdy
ASTANA. KAZINFORM — Qytaıdyń Hebeı provıntsııasynyń Sıantao qalasynda turatyn Іlebaı Dosymbekulynyń aqkóz erligi áleýmettik jeli qoldanýshylarynyń alqaýyna bólenip, alǵysyna ıe boldy.
Áleýmettik jelini sharlap ketken beınejazbadan belgili bolǵandaı, 4-aqpan kúni tús áletinde, turǵyndardyń biri qalany qaq jaryp ótetin Hantszıan ózenine baıqaýsyzda qulap ketedi, izinshe onyń qyzy da ákesin qutqarmaq bolyp ózenge sekiredi.
Jaqyn mańda júrgen 39 jastaǵy Іlebaı aıqaı-shýdy estigen boıda aqboz atyna mine sala aǵyzǵan beti ózenge qoıyp ketip, sýǵa qulaǵan er adamdy aman-esen jaǵaǵa shyǵarady.
Al Іlebaıdyń dosy, qala turǵyny Sý Shaogao boıjetken qyzdy sýdan aman alyp shyǵady.
Der kezinde qutqarylyp, ýaqtyly járdem kórsetilgendikten er adamnyń jaǵdaıy jedel turaqtanady. Oqıǵa ornynan ony týysqandary alyp ketedi.
Jergilikti Jimu News aqparattyq agenttiginiń jazýynsha, Іlebaı sol kúni dosymen birge ózen boıyndaǵy alańqaıǵa Baılýn esimdi báıge atyn baptaýǵa barǵan. Er adamnyń sýǵa ketkenin aldymen Іlebaıdyń dosy Sý Shaogao baıqap qalyp, attan salady, Іlebaı aqboz atpen Hantszıan sýyna tura umtylady. Sý súıekten óterdeı sýyq bolatyn. Ol er adamnyń qasyna jetkenshe, sý attyń saýyryna deıin kóterilip úlgeredi. Bir táýiri ózen aǵysy baıaý bolǵandyqtan, ol sýǵa ketken er adamnyń qolyn birden qarmap, jaǵaǵa súırep shyǵarady.
— Jylqy esti janýar ǵoı. Men atyma sendim.Jaǵaǵa jetkende sýdan taısalyp, sál irkilip qaldy. Qarasam, sýdaǵy adamnyń tóbesi ǵana qyltııady. Oılanyp turmastan tebinip qaldym, aqboz at ózenge bir-aq qarǵydy, — deıdi Іlebaı.
Qytaılyq BAQ-tardyń jazýynsha, Іlebaı Dosymbekuly Qytaıdyń Іle qazaq avtonomııalyq oblysynyń týmasy. 6 jasynan bastap báıgege shapqan onyń ómiri at ústinde ótip keledi. Ol qazir Sıantao qalasynyń irgesindegi sharýa qojalyqtarynyń birinde baqtashylyqpen aınalysyp júr.
Jeti jasar Baılýn — Іlebaı baptaǵan báıge attarynyń ishindegi saıynǵa shapqan saıkúligi.
— Alaıda, oqıǵa kezinde qatty sýyq tıgendikten, temperatýrasy 40°C-qa deıin kóterilip, qazirgi ýaqytta veterınarlyq baqylaýda em qabyldap jatyr, — dep jazady qytaılyq basylymdar.
Іlebaıdyń erligi aqparat quraldarynda nasıhattalyp, batyl áreketi men kásibı sheberligi áleýmettik jelide keńinen talqylanyp, qoǵam múshelerinen maqtaý aldy.
Jeli qoldanýshylary ony «naǵyz rytsar», «aqboz atty qaharman» dep dáriptedi.
Al Sıantao qalasynyń bıligi Іlebaıdy jergilikti deńgeıdegi «Eren erligi úshin» marapatyna usynyp, oǵan 10 myń ıýan (shamamen 700 myń teńge) aqshalaı syılyq tabystady.