Aqbota Nur túsken «Jalǵyz jaýqazyn» serıaly kórermenge jol tartady

«Jalǵyz jaýqazyn» dep atalatyn kartınada basty róldi Aqbota Nur jáne Dáýren Aıdarqulov somdaıdy. Telehıkaıa kórinisteri negizinen Almaty men Almaty oblysynda túsirilgen.

Oqıǵa jelisi dáýletti otbasynyń jalǵyz qyzy Aısulýdyń taǵdyry arqyly órbıdi. Aısulý turmysqa shyǵaıyn dep jatqanda ata-anasynyń qazasyna súıgen jigiti Arsenniń kináli ekendigin biledi. Arsenniń  kózdegen basty maqsaty - baılyq ekenin kesh uqqan jetim qyz taban asty ne isterin bilmeı, AHAJ bóliminen qashyp shyǵyp, bas saýǵalap, naǵashy ájesi turatyn aýylǵa ketedi.  Budan ári onyń ómirindegi qıly kezeńder men buralań sátter alma-kezek aýysyp otyrady.

«Fılmniń «Jalǵyz jaýqazyn» dep atalýy beker emes. Bul búkil týystan, dúnıeden aırylyp,  jalqyz qalǵan qyzdyń taǵdyryn sýretteıtin týyndy. Ol aýylǵa baryp, fılmniń sońynda jeńiske jetedi me jetpeıdi me degen másele sóz bolady» - deıdi  kartına prodıýseri Aqylbek Dosjanov.  

«Teleserıaldaǵy basty keıipker Aısulýdyń rólin somdap, bolmysyn ashý úshin úlken júrek kerek», - deıdi rejısser. Sondyqtan osy keıipkerdi oınaıtyn aktrısany tabý da ońaı bolmaǵan.

«Bul serıalǵa daıyndyq úsh aı júrdi. Óıtkeni basty keıipker Aısulýdy tabý úshin óte uzaq ýaqyt ketti. Kóptegen qyzdar irikteýge qatysty» - deıdi rejısser Tórebek Beısebaev.

Shyǵarmashylyq ujymnyń sheshimimen bul ról belgili ánshi ári aktrısa Aqbota Nurǵa buıyrypty. Kórermen aktrısany «Glamýr dlıa dýr», «Toı lıýboı tsenoı» fılmderinen jaqsy tanıdy.

«Osy ýaqytqa deıin men melodramaǵa túsken emespin. Bul serıal men úshin úlken tájirbıe bolýda. Men ómirde qaljyńbas, ázilqoı, kúlip júretin adammyn, al bul serıalda muńly, ishinde qaıǵysy bar adamdy oınaımyn» - deıdi Aqbota Nur.

Serıaldaǵy qatygez Arsenniń rólin jas akter Aqberen Jumabaev oınaıdy. Aqberenniń aıtýynsha ómirde ol óte meıirimdi  adamdardyń biri. Alaıda kınoda únemi jaǵymsyz keıipkerlerdi somdaıdy eken.    

«Bul - óte bir sumyraıdyń róli. Arsen adam óltirgish, qatigez jan. Bul ról maǵan jaqyn dep aıta almaımyn, biraq jat dep te aıtýǵa kelmeıdi. Óıtkeni men jaǵymsyz keıipkerlerdi somdap kele jatyrmyn. Nege ekenin bilmeımin, qansha jaǵymdy ról oınaǵym kelse de, rejısserdiń kózqarasy sondaı ma álde maǵan sondaı ról túsedi me, barlyǵy menen jaǵymsyz keıipkerdi kóredi.Sondyqtan amal joq, jaǵymsyz keıipkerdi somdap kele jatyrmyn», - deıdi akter.

Sonymen qatar akterdiń aıtýynsha bul tárbıelik máni bar dúnıe bolady. «Bul jobada stsenarısterdiń oıy - sengish, ańqaý, ómirde kirshiksiz taza adamdar men pasyq, qolynan qatygezdik keletin adamdardy ajyrata kórsetý. Bul serıaldyń tárbıelik máni bar dep oılaımyn. Kórermenniń kóńilin kóterip, reıtıng jınaý úshin jasalǵan dúnıe emes. Halyqqa oı salatyn shyǵarma bolady dep oılaımyn» - deıdi akter Aqbergen Jumabaev.

Taǵy týyndydan Serikbaı Ahmetuly, Baqytjan Álpeıisov, Dáýren Aıdarqulov, Sáken Raqyshev, Aqzer Segizbaeva jáne t.b. kóresizder.