Aqbókenderdiń jappaı qyrylý sebebin taba almadyq - Vladımır Bojko
«Búgin mańyzdy bir másele kóterildi. Bizdiń ǵylymı-zertteý ınstıtýttarymyz qaıda? Zoologııa ınstıtýty ne istep otyr? Biz áli kúnge deıin 200 myń aqbókenniń neden qyrylǵanyn taba almaı otyrmyz. Men Úkimette jumys istegende bireý turady da, aqbókender pasterellezden qyrylyp qaldy deıdi. Ekinshisi taǵy bir sebebin aıtady. Biraq áli kúnge deıin naqty jaýap joq», - dedi V.Bojko.
Onyń aıtýynsha, elimizdiń florasy men faýnasyna qaýip tóndirip otyrǵan veterınarlyq aýrýlardyń oshaqtaryn anyqtaý qajet. Onsyz aqbókender de, bekire de qyryla beredi.
«Kaspııde kókserke nege qyrylyp jatyr? Qazir Jaıyq jaqta eki sharýashylyqta bekire balyqtary qyrylyp qaldy. Ózende muzdyń astynda óli balyq qalqyp júr. Biraq bárimiz ún-túnsiz otyrmyz. Kádimgideı tynyshtyq. Tórt aı ótti. Biraq sebebin eshkim bilmeıdi. Balyq kimniń kesirinen ýlandy? Endi ol jerde bekireniń kóbeıetinine kúmánim bar», - dep atap kórsetti V.Bojko.
Aıta keteıik, osydan tórt jyl buryn Qazaqstanda nebári úsh aptanyń ishinde 200 myńnan astam aqbóken qyryldy. Bas kezinde mamandar atalǵan oqıǵanyń sebebin taba almady. Sheteldik mamandar da kómekke shaqyryldy. Olardyń sózine qaraǵanda, aqbókenderdiń qyrylýyna Pasteurella multocida ınfektsııasy sebep boldy.
Búginde álem boıynsha kıikterdiń basym bóligi Qazaqstan dalasynda qonystanǵan. Janýarlardyń atalǵan túrin atýǵa ruqsat joq. Alaıda brakonerler aqbókenderdi atyp, múıiz saýdasynan paıda tabady. Jergilikti jerde aqbókenderden kesip alǵan múıizdiń bir kelisi 150 myń teńgege satylady. Almatyda onyń baǵasy 400 myńǵa deıin barady. Al Qytaıda múıizdiń bir kelisine 4 myń AQSh dollaryn beredi. Sebebi ol jaqta aqbókenderdiń múıizinen dástúrli medıtsınada sanalýan dáriler jasaıdy.