Aqbókenderdi zańsyz aýlaý - uıymdasqan qylmystyq sıpatqa ıe bolýda - E. Álzaqov

ALMATY. QazAqparat- Qazaqstanda aqbókenderdi zańsyz aýlaý uıymdasqan qylmystyq sıpatqa ıe bolýda. Bul týraly búgin Almatyda aqbókenderdi qorǵaý máseleleri boıynsha ótken kezekti jumys otyrysy barysynda QR Aýyl sharýashylyǵy mınıstrligi Orman sharýashylyǵy jáne janýarlar dúnıesi komıtetiniń «Ohotzooprom» óndiristik birlestigi» respýblıkalyq memlekettik qazynalyq kásipornynyń bas dırektory Erzat Álzaqov málim etti.

«Kıikterdi, ıaǵnı aqbókenderdi zańsyz atýmen uıymdasqan qylmystyq toptar aınalysady. Olar bul úshin jol talǵamaıtyn myqty avtokólikter, jyldam júretin mototsılder men qarda júre beretin kólikterdi paıdalanady. Sondaı-aq, «Týraıa» jerseriktik baılanys telefonymen, qarý-jaraqpen, qosymsha janarmaı syıymdylyqtarymen, avtokólikke arnalǵan birneshe memlekettik nómirlermen jáne aqbókenniń múıizin alýǵa arnalǵan ara jáne basqa da qural-saımandarmen jaraqtanǵan. Al ınspektorlardan qashqan kezde olar jolǵa arnaıy «tikenek» temirler tastap ketedi. ıAǵnı, aqbókenderdi atýmen qarapaıym turǵyndar emes, jol talǵamaıtyn qymbatty sheteldik mashına, qymbat qarý, spýtnıktik telefon satyp alýǵa shamasy keletin adamdar aınalysady. Olar aqbókenniń etin almaıdy dese de bolady. Baıǵus janýardy atyp óltirgen soń, múıizin alyp, denesin tastap ketedi. Bul qylmystyq bızneske orasan zor qarjy jumsalady. Sáıkesinshe, qylmyskerler múıizderdi shet elge qymbat baǵaǵa satady», - dedi E. Álzaqov. Sonymen qatar ol, brakonerlik árekettermen ustalyp jatqan memlekettik qyzmetkerlerdiń sany jyldan jylǵa ósip jatqandyǵyn jetkizdi.«Bul, uıymdasqan qylmystyq toptardyń ár túrli memlekettik qurylymdarǵa engendigin bildiredi. Ár túrli deńgeıdegi laýazymdy tulǵalar suǵanaq ańshylyqpen aınalysýǵa jıirkenbeıdi. Mysaly, aǵymydaǵy jyldyń 17-shi qazanynda Aqtóbe oblysynyń Yrǵyz aýdany aýmaǵynda Qyzylorda oblysynyń 6 týmasy mingen eki jol talǵamaıtyn avtomashına toqtatyldy. Tekserý barysynda kólikterden kıikterdiń jańa kesilgen 100 múıizi tabylyp, tárkilendi. Zań buzýshylardyń biri 1974 jyly týylǵan «N» esimdi azamat Qyzylorda qalasynyń polıtsııa maıory, ishki ister bóliminiń jedel basqarý ortalyǵynyń aǵa kezekshi ınspektory bolyp shyqty. Mine, sondyqtan, brakonerlikpen basqa da tabıǵatty qorǵaý qurylymdarymen birlese otyryp kúresýimiz qajet», - dedi E. Álzaqov. Aıta ketelik, sońǵy eki jylda elimizde kıikti zańsyz aýlaý, satyp alý, saqtaý, ótkizý, tasymaldaý men joıý boıynsha 139 qylmystyq is qozǵalǵan. 90 qylmystyq is sot organdaryna jiberilip, 126 azamat sottaldy. Búgingi jumys otyrysyna QR Aýyl sharýashylyǵy mınıstrligi Orman sharýashylyǵy jáne janýarlar dúnıesi komıtetiniń jáne birqatar úkimettik emes uıymdardyń ókilderi qatysty.