Aqbóken jaıly málimetter Tuıaqty janýarlardyń dúnıejúzilik kóshi-qon atlasyna engiziledi
«Tuıaqty janýarlardyń kóshi-qony jónindegi álemdik bastama (GIUM) sheńberinde halyqaralyq ǵylymı komanda ázirlegen Bonn konventsııasynyń (CMS) seriktestigimen jasalǵan jabaıy tuıaqtylardyń kóshi-qon joldary týraly derekter dúnıejúzilik atlasqa kiredi. Bul zertteý dástúrli kóshi-qon baǵyttarynyń bóliný qaýpi tónetin jabaıy tuıaqtylardyń, onyń ishinde aqbókenniń maýsymdyq qozǵalysynyń alǵashqy túbegeıli kartasyn usynady», delingen habarlamada.
Sońǵy on jylda jabaıy tuıaqtylardyń kóship-qoný qarqyny tómendep kele jatyr. Olardyń ǵasyrlar boıy qalyptasqan kóshi-qon joldary adam qolymen jasalǵan kedergilerge, atap aıtqanda kúrejoldar men kúrdeli jol aıryqtary bólip, janýarlar úshin kóptegen qıynshylyq týǵyzdy.
Tabıǵat qorǵaýshylary astanadan eldiń batys aımaǵyna deıin ótetin 2 myń shaqyrym «Ortalyq-Batys» kólik dálizi aqbókenniń Betpaqdala popýlıatsııasynyń arealyn bólýi múmkin dep qaýiptenedi.
Spýtnık baqylaý derekteri kórsetkendeı, aqbókender josparlanǵan súrleýimen únemi qonys aýdarady. Eger qazirgi tańda qabyldanǵan baǵyt boıynsha jol salynatyn bolsa, aqbókender azyq qory jetkiliksiz jerlerde qalýǵa májbúr bolady.
«Jabaıy tuıaqtylardyń qozǵalystaryn kartaǵa túsirý olardyń qonys aýdarýynyń tabıǵı joldaryn saqtaý úshin qandaı áreketter qajet ekenin túsinýge kómektesedi. Sondyqtan, tuıaqty janýarlardyń kóship-qoný atlasyn qurastyrý, álemdegi bıoártúrlilikti saqtaýdy jaqsartý jolyndaǵy jańa meje bolyp tabylady. Zertteýshiler janýarlardyń kóship-qonýyn kartaǵa túsirý jumystary álemniń kóptegen elderindegi ınjenerler men ókiletti organdarǵa iri kólik joldary men dálizderin salýǵa baılanysty jobalaryn qaıta qarastyrýǵa kómektesedi dep úmittenedi», delingen habarlamada.
Atlasty jasaǵanda Qazaqstan bıoalýantúrlilikti saqtaý qaýymdastyǵy qyzmetkerleri jınaǵan derekter de paıdalynady.
Qaýymdasmtyq «Altyn dala» tabıǵatty qorǵaý bastamasy sheńberinde, on jyldan astam ýaqyt boıy ulttyq jáne sheteldik áriptesterdiń qoldaýymen, memlekettiń erekshe qorǵaýyna ıe aqbókenniń Qazaqstandaǵy kóship-qoný joldaryn zertteý boıynsha aýqymdy jumystaryn júrgizip keledi.
