Aqbóken múıizderin satpaq bolǵan kúdikti qamaýǵa alyndy

TALDYQORǴAN. QazAqparat – Taldyqorǵanda 32 jastaǵy kúdikti aqbóken múıizin satyp jatqanda ustaldy, dep habarlaıdy QazAqparat tilshisi.

Kúdiktini ustaý 8 qańtarda polıtseıler men UQK Shekara qyzmetiniń jáne Ulttyq ulan arnaıy kúshteri qyzmetkerleriniń birlesýimen júrgizildi. Aqsý aýdanynyń 32-jastaǵy turǵyny aqbóken múıizin zańsyz satýǵa tyrysty. Tintý kezinde ustalǵan adamnan 222 dana janýarlardyń derıvattary bar eki jol sómkesi tárkilendi.

«Qajetti saraptamalardy taǵaıyndaýmen birge osy fakti boıynsha tergeý QR QK 339-babyna sáıkes júrgiziledi (ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý). Ustalǵan aýyl turǵyny qamaýǵa alyndy», - delingen Jetisý oblystyq polıtsııa departamenti baspasóz qyzmetiniń habarlamasynda.